LICHITHIWE icala lomlingisi obesolwa ngokunukubeza uzakwabo, okuthiwa waziwotawota umphambili embhekile, ngesikhathi beqopha umdlalo ababelingisa kuwo ngo2021.
UMangaliso Ngema wamangalelwa yintokazi ayelingisa nayo, uLorraine Moropa, emdlalweni owawukhonjiswa kuSABC 2, iLithapo. iLithapo.
Kwasuka umsindo ngesikhathi uLorraine enameka inkulumo yakhe ezinkundleni zokuxhumana, ekhononda ngesenzo sikaNgema.
Enkulumeni yakhe waveza ukuthi uNgema wamthinta izinqe zakhe ngesikhathi beshutha umdlalo ababelingisa kuwona. Osaziwayo abehlukene nabalandeli bentokazi bakhombisa ukunengeka ngesenzo somlingisi wesilisa. INPA kubikwa ukuthi ilichithile icala enkantolo ngenxa yobufakazi obungabambeki.
Ekhuluma neSolezwe ngeSonto uMangaliso, uthe impilo ibe nzima kakhulu ngemuva kokuthi icala abelihamba lidicilele phansi isithunzi sakhe. Uthe ngemuva kokubekwa izinsolo wanquma ukuwushiya umkhakha wezokulingisa ngenhloso yokuthi ageze igama lakhe ngokulwa enkantolo.
“Ngemuva kokushiya emdlalweni engangilingisa kuwo nale ntombazane ( Lorraine) ngathatha isinqumo sokubuyela ekhaya. Ngibe sengikhohlwa umkhakha wezokulingisa ngagxila ebhizinisini lemfuyo. Impilo ibingasafani nakuqala kodwa ngikwazile ukukhokhela izikweletu nezindleko ebengibhekene nazo ngebhizinisi engigxile kulo ekhaya kuchaza,” uNgema.
Eqhuba uthe, usola ukuthi kukhona owathuma uLorraine ukuba adicilele phansi igama lakhe. Uthe ubengakaze axabane nale ntokazi futhi kwamxaka ukuthi kungani yathatha isinqumo sokwenza into enonya kanje.
“ULorraine ubexoxa nami nangesoka lakhe ayethi lisemkhakheni wezokulingisa. Okwangiphula umoya ukuthi anganginiki ithuba lokuthi sikhulume ngezinsolo zakhe. Namanje angiqondi ukuthi ngangingayenza kanjani lento ekubeni kwakugcwele abantu esasishutha nabo,” kukhalaza umlingisi.
Uthe ukuchithwa kwecala kukhomba ukuthi wayebhecwa ngobende inyama engayidlile. Mayelana nezinhlelo aphezu kwazo, uthe umatasa nesingili azoyikhipha maduze. Wathi uzimisele nangokuvula inkampani emaketha umsebenzi wamaciko.
Ephetha umlingisi weluleke abantu besifazane ngobungozi bamanga alimaza isithunzi sabesilisa.
UMangaliso unelinye icala abhekene nalo lokudlwengula umzala wakhe owayeneminyaka engu-10.
Le nkakha isike yalingisa emdlalweni owawukhonjiswa kuMzansi Magic, iHouse Keepers, Family Secrets, Ring of Lies neminye.