UYACHICHIMA yinjabulo umculi uMondli Ngcobo, oboshelwe emcimbini owodwa nabaphesheya kwezilwandle.
UMondli uthi yize engaqali ukubonakala esiteji nabaculi baphesheya kodwa ayamjabulisa amathuba afana nalawa ngoba anomuzwa ohlukile.
Uboshelwe nezinkakha zabaculi bakuleli, nabaphesheya edilini lomkenenezo elingoDisemba 1, lapho kuzonandisa uChris Walker, noRegina Belle.
Bazoqhulula izingoma zothando koweThe Platnum Lounge Present Chris Walker and Regina Belle, e-ICC, eThekwini, bese kuthi ngoDisemba 3, balibangise eSun City Superbowl.
Ekhuluma neSolezwe uMondli uthe kuyamthokozisa ukunandisa nabaculi abaqhamuka ezweni elihamba phambili ngomculo osenhliziyweni yakhe, weSoul.
“Abantu ngiyabakhuthaza ukuthi bathenge amathikithi omcimbi ngoba ngimatasa ne-albhamu entsha ezophuma ngonyaka ozayo. Kepha abazohambela umcimbi bazothola ithuba lokuthi bezwe ezinye izingoma ezikhona kuyo. Ngibathatha njengabantu abasenhlanhleni abazoba kulo mcimbi ngoba sizohamba uhambo olumnandi ngezingoma ezingcwele uthando,” kuchaza uMondli.
Uqhube wathi yize kumthathe isikhathi ukuthi aphinde akhiphe i-albhamu entsha kodwa kumele abalandeli bakhe baqonde ukuthi ukusiza abanye abaculi nokubhala izingoma zabo, yikhona okusenhliziyweni yakhe.
UMondli uthe ukusebenza nabaculi abahlukene yikhona okwenze wathatha isikhathi ukuthi akhiphe umculoomusha.
Abanye abakuleli abazovula inkundla kubalwa iJaziel Brothers, Sentle Lehoko noMsizi Shembe, nomsakazi uWilson B Nkosi.
UThabani Nyide ohlela idili lomculo, unxuse abantu ukuthi baphuthume eSpar njengoba kubukeka esephela amathikithi.
Isolezwe linamathikithi amabili okuyobuka umcimbi, eliphisana ngawo. Uma ufuna ukuziwinela wona ungathumela iSMS ethi ISOREGINA ku33258.