INTANDOKAZI yomlingisi wemidlalo yethelevishini, uZolisa Xaluva ukhonjwa kwiSmoke & Mirrors, okuwumdlalo angase akhuze ibuya kuwona.
UZolisa okuthiwa ubechithwe kulo mdlalo nyakenye ngenxa yombango obe phakathi kwakhe nabalo mdlalo othinta imali nokungahleleki kwabaqondisi bomdlalo, kuthiwa ubuyela endaweni yakhe abeyilingisa engusomabhizinisi uCeasar.
Umthombo weSolezwe Ngempelasonto uthe kulokhu uZolisa uphinde wanikwa nomsebenzi wokuba ngomunye wabaqondisi kulo mdlalo futhi uyena osezocija nekhono kubalingisi abasha balo mdlalo.
Nyakenye ushiye kungekuhle, indawo yakhe yavalwa wuHlomla Dandala kodwa ongamukelwanga kahle ngababukeli kulo mdlalo.
Ethintwa uZolisa uthe akulona iqiniso ukuthi uyabuya kwiSmoke & Mirrors.
“Engingakusho ukuthi kuyangithobisa ukuzwa ukuthi abantu basangidinga kuyona. Ngingabuyela khona kodwa kungahamba nemibandela eminingi njengodaba lwemali, ukuba nesikhathi kwami, indawo engizoyilingisa nenkontileka,” kusho uZolisa.
UZolisa owenza ezibukwayo kwiCode 13 kuMzansi Magic ekhonjiswa uma kuyiSonto, uthe uqeda ukushutha isizini yesithathu yeKings of Joburg futhi kunomdlalo aya kuwona kwiNetflix.
Kuthintwa omunye wophrojusa beSmoke & Mirrors uZuko Nodada akatholakalanga ukuze aphawule.
Uthunyelelwe nomyalezo okuze kwashaya isikhathi sokushicilela engawuphendulanga.
Ngo-2022 uZolisa washiya iGomora ekhala ngendlela okubhalwe ngayo indawo ayeyilingisa eyayingamgculisi. Lezo zindaba waziqinisekisa yena ngesikhathi eshiya lo mdlalo. Wakuveza nokuthi wayezimisele ngokuthi ufuna ukuba ngomunye wabaqondisi bomdlalo ukuze enze ubulungiswa ngendawo ayilingisayo kodwa leyo mizamo yangaphumelela.
Ngo-2014 wayekubalingisa abachithwa yiGenerations bekhala ngamaholo. Ukungavumelani nabaphathi balo mdlalo kaMfundi Vundla kwaholela ekutheni bachithwe bonke abalingisi bawo njengoba bateleka wagcina uvaliwe umdlalo. Ubuye usuyiGenerations: The Legacy usunabalingisi abasha abanye abaqale ukugqama kuwona.