IZOBA seManzimtoti Civic Centre, eningizimu yeTheku, kusasa inkonzo yomngcwabo wesilomo sompheki nombhali wencwadi yokupheka edumile ongasekho emhlabeni, uLentswe Bhengu oshone ngoLwesithathu olwedlule.
Esitatimendeni esikhishwe ngabakwaBhengu nabakwaMafoko okungabomndeni walo mpheki, bathe ngaphambi komngcwabo wakhe, bahlele ukuba nezinkonzo zesikhumbuzo eRosebank North, eGoli, nenye ezoba seDurban High School, eThekwini, namhlanje ngo-4 ntambama, neyokugcina ePlayhouse ngo-5 ntambama ehlelwe ngabangani bakhe nabezwana nabo.
“Siyitholile imiyalezo namazwi enduduzo esikuthunyelelwe ngabangani nabezwana nabo esaphila bakuleli nabakwamanye amazwe, futhi sibonga kakhulu ngokuba nathi kulesi sikhathi esibhekene naso esinzima,” kusho isitatimende somndeni.
Nakuba bengandanga ngamaningi, kodwa baveze ukuthi lo mpheki obenencwadi ethi Africa on a plate, udlule emhlabeni esesibhedlela eSandton Medi-Clinic, ngenxa yokugula isikhashana.
Umndeni wakhe ucele ukunikwa ithuba lokuthi umzilele ngokukhululeka.