UMLINGISI owakhipha amagwevu kwiGenerations: The Legacy, nakwiSidingo, uVuyo Dabula, uzosusa uthuthuva kuZalo.
Ngokusho komthombo, uVuyo uzoqala ukubonakala emdlalweni ohamba phambili kuleli kuSABC 1, Uzalo, ngesizini ka-10.
UNomfundo Zondi, okhulumela inkampani ekhiqiza umdlalo iStained Glass Productions, uziqinisekisile izindaba. Lokhu kuvela ngemuva kokuthi Isolezwe, libike ukuthi umlingisi uWiseman Mncube, obedlala indawo kaSbonelo, uzoshiya kowoZalo.
Ngokusho kwesitatimende esikhishwe yiStained Glass Productions, uVuyo uzolingisa indawo kaBentley Majozi, umlisa ozodala uthuthuva KwaMashu. Kuvela ukuthi kunabanye abalingisi abasha okunguNonhle Jali ozodlala indawo kaThandiwe, noSlie Ndlovu ozodlala indawo kaXoliswa, zombili izintokazi zizobe zingamathe nolimi kanti zingosamabhizinisi abangagayelwa mphako.
U-Ofentse Thinane oyinhloko yezinhlelo kwaSABC, uthe njengoZalo, kuyabathokozisa nabo eSABC 1, ukufika kwabalingisi abanedumela ezweni, wathi lokhu kusho ukukhula komdlalo.
“Sithi siwuSABC1, noZalo sijabule kakhulu ukuthi ngesizini ezayo sizobe sibophele abalingisi abasha. Izindawo abazozilingisa ziyasijabulisa. Ukulokhu siletha abalingisi abahlabahlosile kufakazela isifungo sethu esasenzayo sokuthi siyohlale sijabulisa ababukeli bethu.
“Sithanda ukwamukela uVuyo Dabula, Nonhle Jali, Slie Ndlovu, noNtokozo Vilakazi, abanentshisekelo namakhono angengatshazwe. Siyaqinisekisa ukuthi ababukeli ngeke basuke phambi kwamathelevishini abo ngoba lezi zingwazi zizokwenza izinto zamehlo,” kubeka u-Ofentse.
UVuyo waqala ukuzakhela ugazi esalingisa indawo kaKumkani Phakade kuGenerations: The Legacy. Kusukela lapho akabange esazibeka phansi walingisa kwi-Avengers, Collision nasemdlalweni owuchungechunge kwiNetflix, iQueen Sono lapho ayedlala indawo kaShandu Magwaza.