USEGCINE ekhalelwe ngamasongo kaSigonyela uLongwe Twala okwakhishwa incwadi egunyaza ukuboshwa kwakhe ngemuva kokungafiki enkantolo ngenyanga edlule ukuzobhekana necala lokweba.
ULongwe wavulelwa icala lokweba nguyise, uSello “Chicco” Twala, ngemuva kokuntshontshelwa imishini yokuqopha umculo ebiza imali engaphezu kuka-R200 000.
UChicco wathi kwagqekezwa kwakhe engekho ephesheya. Wavulela icala uLongwe nomfowabo, uSello, kodwa icala lahoxiswa kuSello ngenxa yokuntuleka kobufakazi.
NgoSepthemba iNkantolo yeMantshi yaseRandburg yamkhipha ngesexwayiso ngemuva kokuthi ummeli wakhe amcelela wathi ngeke abaleke.
Ngenyanga edlule akafikanga enkantolo nokwagcina kukhishwa incwadi yokuthi aboshwe.
NgoLwesibili emini iSABC ibike ukuthi amaphoyisa akuqinisekisile ukuthi usephinde waboshwa.