USOMAHLAYA uSfiso Nene uthi yize osomahlaya abaningi bethi uma bedlondlobala bangene kwithelevishini noma babe ngabasakazi, kodwa yena akaziboni elandela ezinyathelweni zabo.
USfiso, owazakhela udumo ngokunqoba umncintiswano iSo You Think You’re Funny ngo-2006, ubekhuluma ngemuva kokumenyezelwa njengoqokwe kakhulu emiklomelweni amaSavanna Comics’ Choice Awards anonyaka. Ubambene noThabiso Mhlongo ngokuqokwa kakhulu.
Uqokwe eminxeni emithathu, okungoweComedian of the Year Award, Best Solo Show Award noweSauce of the Year Award.
“Ukunandisa bukhoma yikho okungisebenzelayo engiphila ngakho. Ngiyazi osomahlaya abaningi bangena kwezokusakaza nethelevishini kodwa mina angisiboni isidingo sokwenza okuningi. Angisathandi ukuba kwithelevishini manje, yingakho ngidlalela kude nayo. Ngigxile emicimbini ebukhoma. Uma uyithanda ikulungele kodwa mina uthando lwami lusemcimbini ebukhoma. Ngesikhathi ngiyenza angikubonanga ukukhula kuyo,” kusho uSfiso oke walingisa kwiTaxi Ride.
USfiso, oneminyaka engu-13 engusomahlaya, uthe yize enenqwaba yemiklomelo aseke wayinqoba kodwa ukuqokwa kusho lukhulu kuye.
“Kusho ukuthi abantu basawuthakasela umsebenzi wami. Ngiyanxusa umphakathi wonke waseKZN ukuthi uphinde ungeseke njengenjwayelo uma kuwukuthi ngiqokiwe ungivotele, sibuye nayo le ndondo evotelwayo (Sauce of the Year Award). Lo munxa kuthathwa amahlaya adume ezinkundleni zokuxhumana. Elami engingenele ngalo ngangizidlalela ngiyisimenywa kwiKaya FM kanti abantu bazolithakasela.”
Uthe njengamanje umatasa wenza imicimbi yamahlaya futhi uhambela izindawo ezahlukene, okubalwa kuzo eKapa eSwatini, Nelspruit nezinye. EThekwini uthe uzoza ngasekupheleni konyaka.
AmaSavanna Comics’ Choice Awards agubha iminyaka engu-10 kulo nyaka. Azoba seThe Galleria, eSandton, ngo-Ephreli 15. Ukuvota kwenziwa ku- www.comicschoice.com