ZIYAQHUBEKA nokumhambela kahle izinto umlingisi waKwaMashu, uNomzamo Mbatha njengoba ehlabane ngendondo yeBest African Actress emcimbini amaSeptimius Awards eNertherlands.
Uthole le ndondo ngendawo yeNdlovukazi uNandi emdlalweni iShaka iLembe, ebikhonjiswa kuMzansi Magic ngoJuni ngenyanga edlule.
UNomzamo uthe kuzo zonke izindondo aseke wazithola, le ikhethekile. Uthe yingoba ayihloniphi yena nje kodwa ihlonipha neNingizimu Afrika yonkana.
Echaza ngenjabulo yakhe uNomzamo uthe amaphupho akhe uNkulunkulu ulokhu ewafeza futhi lokho kuyamthobisa.
"Ngibuyela ekhaya nomthwalo ongisindayo kancane emithwaleni yami. Iphupho uNkulunkulu ayenalo ngempilo yami, kuyangijabulisa ukulibona lifezeka. Ngiyabonga ngokuthi ngizikhandlile futhi ngazinikela emsebenzini onzima engibhekana nawo usuku nosuku. Ngizinikelile emsebenzini wami ngathemba ukuthi konke kuzofezeka ngendlela engifisa ngayo,“ kusho uNomzamo.
Uthe uyabonga kakhulu kwiNdlovukazi uNandi, ngethuba lokulingisa indawo yayo.
UNomzamo ekhuluma neSolezwe ngesikhathi kwethulwa umdlalo waveza ukuthi ngesikhathi elingisa indawo kaNandi, wayemuzwa ehamba naye ngaso sonke isikhathi, nokuyinto eyamsiza ukuthi indawo kaNandi ayilingise ngendlela eyaba yiyo abantu sebeyibuka kwithelevishini futhi bayijabulela.
Kwenzeka lokhu nje isizini yesibili yalo mdlalo isiqalile ukuqoshwa nokulindeleke ukuthi ukhuze ibuya kuMzansi Magic ngonyaka ozayo.
I-Multichoice ike yamemezela izindaba zokuthi ivuselele amasizini amathathu, yize bona babehlele ukuthi kube khona amabili kuphela.
Bathi bakwenze lokhu ngenjongo yokuthi umdlalo wenze kahle.