SEKUVELE izindaba ezithi umsakazi woKhozi FM uzokhehla intokazi elingisa emdlalweni okhonjiswa kuMzansi Magic, Uzulu Nomhlaba.
Kuleli sonto kusabalale izimemo zomcimbi kaSbongimpilo Sikhosana ozokhehlwa futhi ambeswe nguKhathide "Tshatha" Ngobe, ngoDisemba 17, eLimehill, eMnambithi.
Umthombo weSolezwe ngeSonto, uthi umkhehlo nomembeso kuzohanjelwa ngosaziwayo baseThekwini, asebemenyiwe.
"Kubukeka kuzoba wumcimbi osezingeni eliphezulu njengoba abantu abamenyiwe beveza ukuthi amabombo ayobe ebheke eMnambithi, ngalolu suku," kusho umthombo.
Imizamo yokuthola uKhathide kayiphumelelanga, ucingo lwakhe belukhomba ukuthi luvaliwe. Nomyalezo athunyelwe wona ukuthi aqinisekise izindaba, kuze kwashaya isikhathi sokushicilela engakawuphenduli.
Ingoduso yakhe uSbongimpilo, ibuze intatheli ukuthi inombolo yayo iyithathephi ngesikhathi imthinta. Ebuzwa ngomkhehlo nomembeso, uvele wavala ucingo engasaphendulanga. Emva kwalokho ubengasalubambi ucingo lwakhe uma ethintwa.
Umthombo wephephandaba oveze izindaba zokumenywa emcimbini, uthe uzobe usezingeni eliphezulu futhi akumenyiwe wonke umuntu.
Uqhube wathi okunye okuvelile wukuthi uzobe uhanjelwe ngosaziwayo nabantu abasezingeni eliphezulu, yingakho izimemo zikhethe abathile okumele babe semcimbini ngoba abadingi wonke umuntu ozoza kuwona.