UMCULI we-Afropop, uMnqobiyazo uthi kumthobisile ukwesekwa eCape Town, njengoba eqale umjikelezo Ubhoko Tour, owokuqala kwemikhulu aseke aba nayo.
Umjikelezo obuseCape Town, ngo-Okthoba 4 -5 uza eWild Coast Casino, ePort Edward, KwaZulu-Natal. Kuwona ucula zonke izingoma ezikwi-albhamu entsha, Ubhoko.
“Ngesikhathi ngiqala ngithi ngiwuyisa eCape Town, ngike ngaba nokuzisola lungakafiki usuku lokuya khona. Ebengikusabela ukuthi bengingakaze ngibe nomcimbi ngihamba ngedwa futhi ngingenalwazi lokuthi bangakanani abathandi bomculo wami khona. Ngithuke sekufike usuku lomcimbi lapho ngithole khona ukuthi amathikithi awo adayise wonke. Kuvele kwangicacela ukuthi baningi abathanda umculo wami kule ndawo. Lokho kungenze ngazizwa ngithobeka ngendlela eyisimanga ngoba bengingazitsheli ukuthi kungenzeka kanje. Abantu baze bacela ukuthi uma kwenzeka ngibuya khona ngithole indawo enkulu ngoba baningi abajike sebefikile ngethemba lokuthi amathikithi bazowathola emnyango njengoba ayesephelile eComputicket,” kuchaza uMnqobiyazo.
Uqhube wathi njengoba eza KwaZulu-Natal, kuzolandela iGoli. Udalule ukuthi asikho isikhathi asibekile sokuthi uzobe esewuqedile ngaso ngoba ziningi izindawo azimisele ukuzihambela.
Uthe kungokuqala eba nomjikelezo omkhulu ngalolu hlobo futhi kuyamjabulisa ukwesekwa ngale ndlela.
“Bekulokhu kuyisikhalo sabantu bethi angibe nomcimbi wami ngedwa. Bebethi noma bengibona emicimbini engisuke ngiqashwe kuyona kodwa abalitholi ithuba lokuthi bangibuke ngicula zonke izingoma zami ngoba ngisuke ngikalelwe isikhathi esifushane.
“Njengoba kungumcimbi wami ngibanika ithuba elanele ukuthi balalele zonke izingoma zami. Uma ngiqashiwe ngisuke ngizogxila kwezisuke zihamba phambili kuphela ngenxa yesikhathi kanti kukhona umuntu othanda ezinye ezikhona kwi-albhamu engingakaze ngizwakale ngizicula. Uma ngiba nomcimbi wami ngihamba ngedwa yilapho bethola khona ithuba lokuthi ngibaculele zona zonke,” usho kanje uMnqobiyazo.
Ekulingiseni uthe usamile kancane ngenxa yokuthi usematasa nomjikelezo. Ubelingisa kwiSmoke and Mirrors wathi indawo yakhe isiphelile emdlalweni.
Amathikithi omjikelezo abiza u-R200 eComputicket.