INTANDOKAZI yomlingisi uDeli Malinga, ethole indondo yeBest Supporting Actress ngendawo eyilingisa emdlalweni iRedemption kumaSouth African Film & Television Awards (Saftas) ngoMgqibelo ebusuku eGoli, ithe ayikho indawo okuthiwa incane kulo mkhakha wabo.
UDeli ubelingisa indawo kaMam’Ngema kulo mdlalo owawukhonjiswa kwiBET Africa. Uthe uvele wangazi nokuthi kumele athini ngesikhathi kumenyezwa igama lakhe njengowinile.
“Incence ifune ukuwa uma ngithi ngiyasukuma. Ngithanda ukubonga uNkulunkulu. Kunoma ubani oke wangabaza uNkulunkulu kumele abuke mina alandele impilo yami. UNkulunkulu uyaphila. Ngithanda ukubonga kubalingisi nabasebenzi beRedemption. Ngibonga enkampanini ekhiqiza umdlalo ngokukholelwa kimi. Ayikho indawo okuthiwa incane. Balingisi ngiyacela nigqugquzeleke uma nibona mina,” kusho uDeli kulezi zinsuku ogqame ngendawo kaMaMzobe kuMkhokha: The Curse, kuMzansi Magic.
Lo mlingisi waseThekwini, uqale ukugqama edlala indawo kaSarah kwiGenerations.
AmaSafta, obekungaka-17, uhlelo lwawo beluphethwe nguLawrence Maleka nowayenguMiss Universe uZozibini Tunzi.
Bekungokokuqala ethulwa bukhoma ngemuva kweminyaka emithathu kukhishwa izindondo ngaphandle komcimbi.
ULawrence akagcinanga ngokuphatha umcimbi kodwa uphinde wahlomula nangendondo yeBest Actor in a Telenovela ngendawo kaZolani ayeyidlala kwiThe River.
Ukukha phezulu kweminye iminxa kuhambe kanje:
-Best Supporting Actor in a Telenovela – Thulani Mtsweni (Gomora)
-Best Actor in a TV Soap – Melusi Mbele (Scandal!)
-Best Actress in a Telenovela – Michelle Botes (Legacy)
-Best TV Soap – Scandal!
-Best Telenovela – Legacy
-Best Supporting Actress in a TV Drama – Nthati Moshesh (Savage Beauty)
-Best Supporting Actor in a TV drama – Craig Urbani (Makoti Season 2)
-Best Actress in a TV drama – Lerato Mvelase (Justive Served Season 1)
-Best tv drama – Lavish
-Best supporting actor in a TV comedy – Desmond Dube (How to Ruin Christmas 3)
-Best Actress in a TV comedy – Thando Thabethe (How to ruin Christmas season 3)
-Most Popular TV Soap/Telenovela – Scandal!