KWETHULWE itende elisha, iJuly Ocean Lounge, elizoba seSuncoast Beachfront ngesikhathi somqhudelwano weHollywoodbets Durban July yalo nyaka.
Kuzoba ngokokuqala kuba netende lalo mqhudelwano elizoba kule ndawo elizobizwa ngeJuly Ocean Lounge.
Umgqugquzeli walo, uShaun Smith, uthe bafuna ukwenza okwehlukile ukusingatha abantu abazobe beze emjahweni wamahhashi nonyaka.
“Sitholile ukuthi kunabantu abangakuthandi ukuba ngaphakathi eGreyville Racecourse ngenxa yokugcwala kakhulu uma kunalo mjaho. Sinqume ukuthi sibe netende labantu abathanda ukuzihlalela endaweni engenaso isiphithiphithi. Khona bazokwazi ukuzijabulisa ngayo yonke into eyenzeka kwiDurban July njengokubuka umjaho wamahhashi ozobe uvezwa kumathelevishini amakhulu azobe ekule ndawo. Nabafuna ukubhejela amahhashi izobe ikhona indawo abazoyisebenzisa ukuyobheja. Kosomabhizinisi abayingxenye yetende lethu bazoba nezindawo zabo ngaphakathi etendeni lapho bezobe bemaketha khona amabhizinisi abo baphinde bakwazi ukuhlala nabantu babo kanjalo nabafuna ulwazi ngamabhizinisi abo,” kusho uShaun.
Uthe itende labo lizohlukaniseka izigaba ezine njengoba lizoba neTier 1 kuze kufinyelele kuTier 4. Nemali yokungena khona uthe izobe ingefani njengoba izohlukaniseka ngokwezigaba zalo.
Uveze ukuthi imali yokungena khona isuka ku-R4 000 umuntu emunye kodwa akekho ozoyikhalela imali yakhe ngoba bona bazobe benokudla neziphuzo okungakalelwe sikhathi. Uthe uma usungenile etendeni udla okuthandayo, uphuze okuthandayo kusuka ungena ngo-10 ekuseni kuze kushaye u-10 ebusuku. Uveze ukuthi alikho itende elinjalo eliba kwiDurban July njengoba amaningi kuba nezikhathi okukalwe ukuthi kudliwa ngazo.
Uqhube wathi abaculi abazobe besematendeni amaningi ngeke babasebenzise ngoba bafuna ukuba nababo abahlukile. Ukhale ngokuthi kubona kuzobe kungawenzi umqondo ukuthi basebenzise umculi noma usaziwayo abantu abazobe bekwazi ukumbona lapho kungenwe khona ngemali encane.
Ohlwini lwabaculi abazobe bekhona noDJ, uthe abakaphothuli ukuxoxisana nabo kodwa asebeqinisekisiwe nguLerato Kganyago, Zisto noRoger Goode. Uthe basaxoxisana nabanye kodwa izingxoxo seziya emaphethelweni.
Yize ethe ngeke badalulwe okwamanje kodwa amagama abo uwashilo futhi ngezinye zezintandokazi zabaculi bakuleli.