UMLINGISI oqavile womunye wemidlalo egaleleke kwezwakala kwiMzansi Magic, osihloko sithi How To Manifest A Man, uMnqobi Kunene ukholwa wukuthi ukubeka umsebenzi phambili kwenze washeshe wangena khaxa kule ndima, esanda kufika.
Lo mlingisi ubekhuluma neSolezwe njengoba kusanda kuqala isizini yesibili yalo mdlalo ofike kwezwakala, ushiya abantu befuna impinda, nebala kwaba njalo njengoba sekuqalile ukukhonijiswa kwesizini yesibili, ngoMsombuluko ngo-8 ebusuku.
“Nami ngiyamangala namanje uma ngibuka umsebenzi omkhulu esengiwenzile esikhathini esiwunyaka kuphela ngifikile endimeni, okwenza ngibone ukuthi ukuzikhandla ngomsebenzi wami njalo kuthela izithelo ezinhle nezibonakalayo kubantu,” kusho yena.
Le nsizwa edabuka eMondlo, enyakatho yaKwaZulu-Natal, iqale ukuzibonakalisa kule ndima emdlalweni wakwiShowmax othi Outlaws, ilingisa indawo kaKwanele Dlamini. Ibonakale kafishane emdlalweni wakwiMzansi Magic, iMy Brother’s Keeper, ilingisa indawo kaKhwezi Shabalala, osewashona ngokomdlalo.
Akuphelanga sikhathi esingakanani, yabonakala ilingisa indawo kaSimphiwe kwi-How To Ruin Love kwiNetflix, kwase kulandela indawo kaGeja, emdlalweni wakwiSABC 1 Uzalo, njengoba manje yenza ezibukwayo kwisizini yesibili ye-How To Manifest A Man.
“Okunye okungijabulisayo, nakuba kuyinselelo wukuthi le misebenzi ibilandelana eduze, obekwenza umsebenzi ube mningi nokuphoqe ukuthi ngizikhandle futhi ngihlale ngicwaninga ngokwehlukana kwezindawo engizilingisayo, ukuqikelela ukwenza ubulungiswa kuzo zonke,” kusho uMnqobi.
Uthe la mathuba akawasebenziseli ukwakha udumo nokwenza imali kuphela, kepha uyazihlupha nangokungale kokulingisa ukuhlomela ingomuso. “Ngenzela ukuba nolwazi olwanele lokukhiqiza imidlalo yethelevishini ngomuso,”’ kusho umlingisi.