UMCULI waseChesterville, uSkye Wanda, uthi usezogcina “ngokuyivakashela” iHip Hop okungolunye lohlobo lomculo olwamgqamisa.
Lo mculi ukusho lokhu ngemuva komcimbi wokujabulela indondo abuye nayo kumaMetro FM Music Awards abeseMbombela emasontweni amabili edlule.
Uhlomule ngendondo yeBest House Song ngengoma ethi Amazwi.
Umcimbi ubuseChesterville ngeSonto lapho bekunojenga lwezimoto obeluguduza elokishini ngaphambi kokuthi uphelele eMashamplanez Lounge khona kule ndawo.
Ubonge abantu abamesekile, wathi bakhombisa ukuziqhenya ngaye.
“Nasenkulumeni yami yokwamukela indondo ngakuveza ukuthi ngiqhamuka kuphi. Yikho okwenza abantu baziqhenye kakhulu ngokunqoba kwami futhi bazishaya isifuba ukuthi ngingowabo,” kusho yena.
Uthe uye kulo mcimbi eyifuna le ndondo kodwa enalo uvalo oluncane ngenxa yabantu abeqhathwe nabo.
“Benginakho ukuzethemba kodwa abantu ebengiqhathwe nabo basezingeni. Ngiyabonga kubantu ngamavoti.”
Uthe ulungiselela ukukhipha i-Extended Play (EP) yakhe entsha, iStarlight, maduze ezoba nomculo womdanso.
“Umculo womdanso yiwona engiwenzayo manje. Ikhona ingoma yeHip Hop engike ngayenza emasontweni adlule. Ngicabanga ukuthi sengizogcina ngakho ukuyivakashela, hhayi ukuthi ngiyenze ngokugcwele. Ayikho imali kangako kuyo.”
Uphethe ngokweluleka ababukela kuye ngokuthi kumele bangathembeli emculweni kuphela kodwa kube nokunye abakwenzayo.
“Kungcono uma umculo uwenza ngothando, ungathembeli kuwo kuphela ngoba uma ungaphumeleli uzoshayeka emoyeni. Kuhle kube khona okwenzayo eceleni nawo ube uwenza. Nakhona uma usuphumelela kumele ube neqhinga lokuthi uma ungasashisi izikhotha eminyakeni emihlanu ezayo yini enye ozoyena.