USAZIWAYO wakuleli odabuka KwaNdengezi, eThekwini, uPearl Thusi, udlala indawo eqavile efilimini evutshelwe eLagos, eNigeria.
Kule filimu esihloko sithi Her Perfect Life, uPearl ulingisa indawo yowesifazane oneminyaka ewu-39 wakuleliya zwe, okubukeka zimhambela kahle izinto empilweni, u-Onajite Johnson-Ibrahim.
Lezi zindaba zidalulwe nguPearl ekhasini lakhe le-Instagram ngesikhathi eveza i-trailer yefilimu, ebihambisana nombhalo othi "Kuyintokozo enkulu kimi ukumemezela ukuthi iHer Perfect Life iyeza maduze kwi-Apple TV! Le filimu ibhalwe futhi yaqondiswa nguMo Abudu. Le filimu idingida ngodaba luka-Onajite Johnson-Ibrahim, okungowesifazane obukeka ekhomba ngophakathi kodwa lempilo ifana nekhiwane elihle."
Uthe usekulangazelele kabi ukuba abantu bahlanganyele nabo kulolu hambo oludingida isihloko esimayelana nesifo sengqondo. Ube esenxusa umphakathi ukuba uqale izingxoxo.
Esephetha uPearl uthe uyaziqhenya kakhulu ngabantu ababambe iqhaza ngesikhathi kudidiyelwa ifilimu, ikakhulu u-Abudu ngokuba nesibindi esiyisimanga sokuqhamuka nomqondo. Umfanise nesibonelo esihle.
Lesi siphalaphala esilingiswa nguPearl singusomabhizinisi ophumelele, onomyeni omphethe kahle nabantwana ababukeka benekusasa eliqhakazile ngenxa yokuthi banomqondo okhaliphile.
UPearl ulingisa indawo esemqoka nozakwabo ongumnsinsi wokuzimilela eNigeria, uJoseph Benjamin, odlala indawo ka-Ahmed Ibrahim.
Okuxakayo ukuthi kungani u-Onajite efuna ukumosha impilo emnandi kangaka nehalelwa nanoma yimuphi umuntu wesifazane emhlabeni.
