UMCULI obuye abe ngumlingisi onyamalale esithubeni emdlalweni wethelevishini Isiphetho, okhonjiswa kwi-e.tv, ucacisa ngokuhamba kwakhe kungalindelekile.
ULindani Mhlongo (35), odlala indawo ephambili yesigebengu uDlangamandla, uthe akukho okubi ngokuphuma kwakhe emdlalweni.
“Kuyiqiniso ukuthi sengiphumile kulo mdlalo. Ngalokho akukho okubi. Empeleni bese kuphela yona indawo yami. Akukho lapho siphambane khona nabanikazi bawo kodwa ngangivele ngazisiwe ukuthi izophela nini. Ngokwazi kwami ukuthi kushintsha umbhalo womdlalo ngoba usuzogxila kwabanye abalingisi, ithi ukuma eyami. Noma ngingazi ukuthi izobuyiswa nini kodwa ngisemseni wababhali ukuthi bacabanga ukuyibuyisa nini,” kuchaza uLindani.
Umlingisi uchazile ukuthi bekungokokuqala ethola indawo ephambili emdlalweni wethelevishini. Useke walingisa kwiSono, The Wife, Muvhango nakwi-Amazing Grace. Kuyona yonke imidlalo uthe ubefika azunguze nje asheshe aphume, uqale ngeSiphetho ukuthi adlale isikhathi eside.
ULindani ubonge abeBlack Brain Pictures ngokumnika ithuba. Uthe uyazi ukuthi indawo abeyilingisa ibingenye yezinkulu. Waqhuba wathi ngisho kusenziwa inhlolokhono kwakufunwa ongayilingisa kuzona zonke izifundazwe kwaze kwatholakala yena, kwabonakala ukuthi angabenza ubulungiswa kuyona.
Ubelingisa indawo yesigebengu esisatshwayo ebesiphethe izigebengu nebesisebenzisana namaphoyisa ukugwema ukuboshwa.
Ngaphandle kokulingisa uLindani, odabuka esigodini kwaMatsheketshe, kwaMandlakazi kwaNongoma, ungumculi. Emculweni waziwa ngoWalk SA futhi uqopha ngaphansi kwenkampani yakhe iWalk SA Top Dreams ezinze eGoli. Kuyona kukhona nabanye abaculi asebasayinile ngaphansi kwayo. Ingoma yakhe eyaziwa kakhulu iMadlozi Vukani. Uke waba nakwividiyo yengoma kaMiss Pru esihloko esithi, Hulumeni. Uthe kumanje umatasa ulungiselela ukukhipha i-albhamu entsha athe useqedile ukuyiqopha.