UMLINGISI osematheni ngokulingisa indawo yokungenwa emva kokushonelwa wumyeni wakhe ngokomdlalo, uthe akakholelwa kulo mkhuba futhi uwubona uyihlazo.
UZola Nombona odlala indawo kaFakazile, oshonelwe wumyeni wase engenwa wumfowabo womyeni kwiMy Brother’s Keeper, ekhonjiswa kuMzansi Magic, uthe akaziboni ephila le mpilo.
Ngokunjalo nokuba sesithenjini uthe yinto angeke azifake kuyona noma ngabe kunjani.
“Indlela engiyiyona nengibona ngayo izinto, angiziboni ngiba yingxenye yaleli siko. Ngeke nje ngilunge esithenjini. Weeeee! Ngathi sengiyabona. Yize kuyinto ekhona neyenziwayo kodwa kimina ayijwayeleki. Okokungenwa kona angazi nokuthi ngingayiqala ngakuphi ngoba yinto engingeke ngadlalela kuyona noma ngabe kuthiwa kunjani. Ukuzila angikuxwayi ngoba kuyisidingo uma ushonelwe. Ngisho nokugqoka ingubo emnyama ekhombisa ukuthi ngizilile ngeke ngakunqena lokho,” kusho uZola.
Le ntokazi idlala indawo kaFakazile oshadele kwaShabalala nowashonelwa wumyeni oyindodana yakulo mndeni eyayingusomabhizinisi. Ekushoneni kwakhe uphinde angenwe enye indodana yakhona evele inonkosikazi wayo ngenhloso yokuthi imlekelele ukuqhuba ibhizinisi lomyeni wakhe.
Echaza ngale ndawo ayilingisayo, uthe kukhona afana ngako nalo mlingisi.
“UFakazile ungumuntu oyilwelayo into ayifunayo nophikelelayo. Lokho kuyinto efanayo nengiyiphilayo. Noma ngabe ngibhekene nani empilweni angiliphosi ithawula ngivuka ngizithathe njengoba kwenza uFakazile,” usho kanje.
Uthe ukulingisa le ndawo akubanga lukhuni kuyena ngoba ezinye izinto unolwazi lwazo futhi njengomlingisi uhlale ekulindele ukuthi kungaqhamuka noma iyiphi indawo okumele ayilingise.
Kwesinye isikhathi emidlalweni yethelevishini kuke kubhalwe indawo yomlingisi iqondaniswe nempilo yakhe yangempela. Kulokhu, uZola uthe indawo yokukhulelwa ayidlalayo ayiqondaniswe nalutho, uyalingisa akakhulelwe.
Ngaphandle kwale ndawo ayilingisayo, uthe zikhona ezinye izinto amatasa nazo kodwa angeke akwazi ukuzidalula okwamanje. Uthe okumjabulisayo ukuthi indima abakuyona ayibanqindi ukuthi benze eminye imisebenzi noma ngabe basasebenza kuleyo midlalo abasuke belingisa kuyona.
Le ntokazi yaqala ukulingisa ngo-2013. Phakathi kwemidlalo yethelevishini aseke walingisa kuyona kukhona iLockdown, iZibondiwe, Forced Love, Single Galz, Isono ngo-2021, Wathinta Umfazi ngo-2021, Slaying the Dragon ngo-2021, Generations: The Legacy ngo-2021 kuya ku-2022, The One Who Got Away ngo-2021 neRoomies nyakenye.