UZIME wakuleli ubuye okokuqala ngqa ekhaya selokhu athola isicoco sikaMiss Universe lapho athatha khona indawo yesithathu. ULalela Mswane wamukelwe ngenkulu inhlokomo esikhumulweni sezindiza eKing Shaka eThekwini lapho ebelindwe khona abantu abaqhamuka ezindaweni ezahlukene. Izimeya zomasipala abahlukene bezikhona okubalwa eyaseMlalazi, Nkandla, Mhlathuze, Mthonjaneni neyaseKing Cetshwayo.
Kulindeleke ukuthi ahlangane neSilo uMisuzulu kaZwelithini, iMeya yaseZululand uMnuz Thulasizwe Buthelezi kanjalo nemeya yaseKing Cetshwayo uMnuz Thami Ntuli. ULalela ngokuhamba kosuku kulindeleke aphelezele uNtuli eyomukelisa abafundi bakamatric abaphase kahle ngo-2021. Osaziwayo nabo abanye bebekhona okubalwa osomahlaya Simphiwe Shembe, umsakazi wegagasi FM u-Alex Mthiyane nabanye.
Ezokuvakasha azizosala ngaphandle njengoba iTourism KwaZulu-Natal iyingxenye yalolu hlelo, abeTKZN babonakele naseKing Shaka namhlanje bezokwamukela uLalela. Kusasa kulindeleke ukuthi aphinde avakashele enye yezindawo zokungcebeleka nokuvakasha iMfulawozi Wilderness.
NgeSonto uzohlangana nemeya yaseMfolozi bese elibangisa ezinkundleni zemidlalo KwaSokhulu ngakubo lapho ezobe elindelwe khona umphakathi.