WETHUSE abaningi udadewabo kaKelly Khumalo, uZandie eveza ukuthi uzimisele ngokweseka udadewabo kukho konke abhekene nakho.
Kuleli sonto kube kuningi ukukhuluma okuqalwe wukuvela kwezinsolo zokuthi kungenzeka ukuthi wuKelly owadubula ngephutha uyise wengane yakhe, owayengunozinti we-Orlando Pirates, uSenzo Meyiwa. Kuke kwavela nezindaba zokuthi uZandie ukhiphe ingoma enezinhlamvu okusolakala ukuthi zigigiyela uKelly.
Kuphinde kwanokuqagela kokuthi kungenzeka ukuthi uZandie kube uyena fakazi ochazwe wummeli wabasolwa kuleli cala, njengozosho ukuthi wazibonela ngawakhe uKelly edubula ngephutha uSenzo.
Izolo uZandie unameke ivideo eveza ukuthi uyameseka udadewabo futhi uzowa naye evuka.
"Koze kube sekugcineni mtakama, uma ungidinga nje wena dali ubongishayela ikhwela," kusho uZandie kwi-Instagram. UZandie unconywe ngokuba udadewabo kaKelly oneqiniso nobeka umndeni wakhe phambili yize zikhona izinkinga ababhekene nazo laba baculi.
" Wow, ngaze ngakuthanda, kuqinisiwe uma kuthiwa akukho okudlula umndeni," kusho uNdlovu Nosihle.
" Nazoke sisi ajabhe usathane," kusho uMomo Tipat.
" Zandie ngicela nihlale phansi nikhulume," kusho u-Anita Morgado.
" Imbokodo yangempela lena, ngiyamthanda, " kusho uBuhle Khumalo.
" Sengifisa ukunibona ndawonye ngoba nginithanda nobabili futhi angikwazi ukuthatha uhlangothi lothile," kusho uWinnie Zandile.
Lezi zelamani zaziwa ngokuba yinkukhu nempaka, futhi zaphumela obala zatshela izwe ukuthi azisabhekani.
Akagcinanga lapho, uZandie ukhumbuze abantu ngengoma yakhe Ikhwela nesiqalile ukutholakala ezinkundleni zomculo kwi-internet. Icala likaMeyiwa liyaqhubeka enkantolo kanti kulindeleke ukuthi agcine ebiziwe lo fakazi omqoka nosolwa ngokugodla ulwazi lokwenzeka ngelanga lesigameko. Ngaphandle kwalo fakazi abantu balokhu bephakamise njalo ezinkundleni zokuxhumana ukuthi bafuna baphekwe ngemibuzo kwithelevishini nabo bonke ababekhona ngelanga lesigameko.
Leli cala selokhu laqala kuningi ukushaya amakhala ngendlela amaphoyisa aqoqa ngayo obufakazi endaweni yesigameko nokwagcina kuholele ekutheni ligcine selinamadokodo amabili. Phambilini uKelly waqopha ivideo wayinameka ezinkundleni zokuxhumana eveza ukuthi usekhathele ukubhecwa ngobende inyama engayidlanga, ngakho uzozikhulumela ngokwenzeka ngelanga kubulawa uMeyiwa. Yize esaba nezingxoxo ezikhethekile waze waba nohlelo lwakhe lwethelevishini echaza ngokuba isisulu, abantu namanje abakamkholwa nokwenza ahlale egxekwa.