UMFANA osewaphenduka isilomo kubantu ezinkundleni zokuxhumana, ngokudla indwangu, uthole ithuba lokulingisa emdlalweni wamahlaya ohamba phambili iSes’ Top La.
UValdo oyindodana yomculi nomdansi uLindough, unguJunior oyindodana kaMandla olingisa indawo kaThemba kulo mdlalo okhuza ibuya kwithelevishini.
ULindough uthe uValdo kade akhombisa ikhono kwezokulingisa kodwa engafuni ukumfakela ingcindezi. Ukuhlala beqopha amavideo abawasabalalisa ezinkundleni zokuxhumana uthe yikhona okugcine sekumenza akukhuthalele ukulingisa uValdo. "Ngathola i-email yokuthi kuzoba nenhlolokhono nyakenye, ngamcija ngamagama okumele awasho ngase ngimqopha ivideo elingisa. Ngokuhamba kwesikhathi ngathola umyalezo wokuthi uthathiwe kulo mdlalo, uzoba yindodana kaMandla nokuyinto eyamjabulisa kakhulu,"kusho uLindough.
Eqhuba uLindough uthe ukuqinisekisa ukuthi indodana yakhe ayenzi into engayithandi, uyayiyeka ikwenze konke ngendlela evumelana nayo. " UValdo uyacula, uyadansa uyalingisa uma kumele ahlangane nabantu ngiyamlungiselela ngokwengqondo ngimazise nokuthi bazomjabulela bacele nezithombe. Ukulingisa ukwenza ngendlela elinganayo nokudansa nokucula ngoba usemncane akukho engingathi ugxile kukho," kusho uLindough.
Ephetha uthe kuzona zonke lezi zinto ezenziwa yindodana yakhe, uyaqinisekisa ukuthi uba khona ukuyeseka, ukuyivikela nokuqinisekisa ukuthi yenza umsebenzi ewuthandayo. "Noma okuningi ngizenzela ngizifundisela uValdo kodwa uNkulunkulu uyingxenye enkulu yakho konke lokhu okwenzekayo. Yonke le nto siyiqale sizidlalela siziqopha ama-video ekhaya kodwa sekuzomakhela ikusasa elingcono ngesiphiwo anaso," kusho uLindough. ISes’ Top La kulindekele ukuthi idlale maduze kwithelevishini nokusazomenyezelwa.