UPHROJUSA womculo weHouse eThekwini, ukhwele wadilika kuPrince Kaybee nakuZanda Zakuza ezinkundleni zokuxhumana ekhala ngemali yengoma ethi Club Controller, eyashisa izikhotha ngo-2018.
UNkazimulo “TNS” Ngema, uveze ukuthi sesiside isikhathi yena neqembu laKwaMashu loDJ ababili, iLesoulmates belinde uR1 million ababezocazelana wona nabawuthenjiswa yinkampani yezokuxhumana, iVodacom.
Uthe ngokwesivumelwano ababa naso bobahlanu ngo-2018, babezohlukaniselana amaphesenti alinganayo bonke.
“Ngemva kwezinyanga ezimbalwa siyikhiphile ingoma sathola umbiko kwaVodacom owawuthi uZanda ufuna ukuthola u50% bese thina abanye sihlukaniselane imali elinganayo. Wangicasula umona kaZanda ngoba wasihambela ngemuva ekubeni sasikhulumile savumelana, ngokuthi sonke sizothola into elinganayo. Ingoma kwakungeyona neyakhe njengoba eseqhamuka nezinguquko ezingasile. UPrince Kaybee angimazi ukuthi uthuleleni engayilungisi lento,” kuchaza uTNS.
Eqhuba uthe, okumphatha kabi ukuthi abanikazi bengoma babhekene nenkinga enkulu ngoba beqale ukuxakeka kugasela iCovid-19. Uthe ngenkathi etshela iLesoulmates, ngoKaybee yayivele ishaya amakhala ngaye, ingafuni ukusebenza naye kodwa kwaba nguyena oyincengayo ngenhloso yokuthi kumaketheke ingoma yeqembu.
“Yimina osenkingeni namhlanje. Angikhululekile nhlobo emoyeni njengoba ingakafiki imali kubanikazi bengoma. Engifuna kwenzeke njengamanje ukuthi uZanda noKaybee balulungise lolu daba,” kubeka yena.
Ethintwa uVuyo Ndlovu weLesoulmates, uthe babona sengathi kudlalwa ngabo ngoba sesiside kakhulu isikhathi bethenjiswa ukuthi iyalungiswa inkinga ababhekene nayo.
“Akukwazi ukuthi kungaphela iminyaka emithathu singakayitholi imali. Okubuhlungu nje ukuthi ingoma yethu le, esisuse umsindo omngaka. Okumele bakwazi bonke ukuthi thina asihlangani nezingxabano ezikhona phakathi kwabo. Esikudingayo nje ukuthola imali esasivumelene ngayo,” kubeka ilungu leLesoulmates.
Ethintwa uZanda wale waphetha ukuphawula wathembisa intatheli yephephandaba ukuthi uzoyinika inombolo yemenenja yakhe. Kuthe noma isithumela umyalezo imkhumbuza ngenamba abethembise ukuyinika yona, wangabe esaphendula kuWhatsApp.
Imizamo yokuthola uPrince Kaybee ayiphumelelanga kanti ucingo lwakhe belukhala lungabanjwa. Umyalezo athunyelelwe wona, kuze kwashaya isikhathi sokushicilela engawuphendulanga.