ISILOMO somlingisi wakuleli sithi asikakakholwa ukuthi yiso esihlabene ngendondo esemqoka kwezokulingisa phesheya kwezilwandle. UThuso Mbedu usho kanje ngemuva kokuklonyeliswa ngendondo yokuba ngumlingisi wesifazane ovelele kuma-37th Film Independent Spirit Award abeseSanta Monica, eCalifornia, ngeSonto.
UThuso uthole le ndondo ngendawo ayilingisa emdlalweni kaBarry Jenkins, iThe Underground Railroad. Kulo mdlalo uThuso ulingisa indawo kaCora Randall. UThuso kulo munxa ushaye amakhanda u-Anjana Vasan olingisa kwiWe Are Lady Parts, Jana Schmieding weRutherford Falls, Jasmine Cephas Jones weBlindspotting noDeborah Ayorinde weThem Covenant.
"Nginenqwaba yabantu engidinga ukubabonga kodwa ngisadinga isikhathi sokuthi kungene kahle kimi lokhu. Ngibonga kakhulu abeFilm Independent ngokungihlanganisa nabantu abakhaliphe ngalolu hlobo. Kuyangithobisa, ngiyabonga kakhulu ngokungihlonipha," kusho uThuso.
Selokhu ethole le ndondo uThuso, kuyachwaza ezinkundleni zokuxhumana kuleli abantu bembongela ngokumela kahle iNingizimu Afrika. Naphesheya kwezilwandle balokhu bembongele njalo abantu bakhona.