ABAWUVALI umlomo abantu ezinkundleni zokuxhumana ngendlela abageze igilo ngayo uThando Thabethe kwiHousekeepers. UThando, olingisa indawo kaLinda Ndlovu, esiqephini sokugcina sikasizini 3 kulo mdlalo, uphethe ngegiya eliphezulu nelishiye abantu belangazelele usizini 4. Yize uThando engenaso isipiliyoni seminyaka eminingi njengabanye kwezokulingisa futhi engagxilile kukhona kuphela kodwa abantu bathi ukhombise elikhulu ikhono wedlula nabalingisi abadala, asebenamava eminyaka kulo mkhakha.
"Thando, unekhono mntwana wasekhaya, ungumlingisi ovelele. Lesi siqephu sokugcina singishiye ngishayelwa inhliziyo kabi. Engathi abadala bangakuvulela amathuba," kusho uTheboy Mich.
"Lo mdlalo usikhombisile ukuthi uThando akayena nje umlingisi omuhle kodwa uvelele, ngalokho siyabonga ethimbeni lonke," kusho uBruno Sigwebela.
"Uhlale ezokuthatha akubeke njalo ngendawo ayilingisayo," kusho uMpho Moloi. UThando ubonge ezinkundleni zokuxhumana ababukeli ngokulandela lo mdlalo nokumeseka.