UKUKHUTHALA kweqembu eligijima kwiBetway Premiership, i-TS Galaxy ekufukuleni abantu abasha emakhonweni ahlukene, kudobe umlingisi. Umakadebona kwezokulingisa uMondli Makhona, odume emidlalweni ehlukene okubalwa The wife, Shaka: iLembe, uvumile ukusebenzisana neTS Galaxy, emnike wokuba yinxusa layo.
Exoxa neSolezwe Ngempelasonto, uMondli uthe ayikho into emhlaba umxhwele njengokubona abantu abanentshisekelo yokwenza izinto ezinhle nabathanda ukusiza abanye, bethuthuka.
“Yingakho kuthe uma kuvela leli thuba ngalibamba ngezandla zombili ngoba ngibona ukuthi i-TS Galaxy ingelinye lamaqembu azimisele ebholeni elikhokhelwayo. Ngithanda nokuthi aligcini ngokudlala ibhola kuphela kepha linezinhlelo elizenzayo zokufukula abantu abasha ekuthuthukiseni amakhono,” kuchaza uMondli.
Eqhuba, uthe uyakuqonda ukuthi akuzukuba lula ukudoba abalandeli bebhola lezinyawo ukuthi balandele leli qembu elidlalela imidlalo yalo yasekhaya eMbombela Stadium, eMpumalanga.
“Nokho ngizimisele ukwenza okusemandleni ami ukulikhulisa, ngilisize ukuthi lidobe abalandeli abaningi abasha ngoba ngizobonakala ngihamba nalo uma lenza izinhlelo ezahlukene, futhi ngizoba nalo kweminye imidlalo yalo, ikakhulu eyasekhaya. Konke lokho ngikwenza ngoba ngicabanga ukuthi kuningi okuhle elingakwenza ukufukula umphakathi.”
Umlingisi udabuka eMacambini, eMandeni. Uneminyaka engaphezu kwa-25 esendimeni yokulingisa. Uselingise emidlalweni eminingi esingabala kuyona iGenerations: The Legacy, Uzalo, Imbewu, Nikiwe, The Wife neShaka: iLembe.