UMCULI wakuleli uKelly Khumalo unqabile ukungena esikhaleni sikaSomizi Mhlongo obekumele ayonandisa emcimbini omkhulukazi wokuvulwa kwendawo yokudlela esezingeni lomhlaba eZimbabwe.
USomizi bekufanele abe ngomunye wabapheki abayizitatanyiswa kuvulwa iGarwe Restaurant, kodwa umkhandlu wamasonto akuleliya lizwe, i-Apostolic Christian Council of Zimbabwe nophiko lwentsha yeZanu-PF, babhalela uMengameli waseZimbabwe, uMnuz Emmerson Mnangagwa, incwadi evimba uSomizi ukuba angalokuthi abeke umcondo wakhe kulelizwe ngoba uthandana nabobulili obufana nobakhe.
Abalo mcimbi babe sebemema uKelly osamukelile lesi simemo kodwa uthe uma ezwa ukuthi kanti banqabe uSomizi ngoba ethandana nobulili obufana nobakhe, naye wabachitha wathi kumele eseke uzakwabo angamdayisi.
Nakuba kunjalo kodwa uSomizi ubuye wamemezela ukuthi usethole omunye umcimbi eNamibia lapho ezonandisa khona. Ufake i-video egubha eseNamibia.