SILOKHU sisematheni njalo isiphalaphala sentokazi engumlingisi, usomabhizinisi nomculi.
Lokhu kulandela ukuthi sekuvele izindaba ezimnandi zokuthi uSimphiwe Simz Ngema uzobonakala ngenyanga ezawo emdlalweni we-1 Magic i-365 Days.
Lo mdlalo kulindeleke ukuthi uqale ukukhonjiswa ngo-Ephreli 3 kanti uzodlala indawo kaRea ongungoti wezemfashini.
USimz lezi zindaba useziqinisekisile wanameka nombhalo ohambisana nakho nokuyizindaba ezijabulise abantu abaningi.
"UNkulunkulu uyaqhubeka nokungenzela konke okuhle empilweni yami. Ngiyabonga kakhulu uJehovah mkhulu," kusho uSimz.
Abantu balokhu bembongele njalo okubalwa nosaziwayo.
"UNkulunkulu muhle kakhulu, ngiyakubongela," kusho u-Athel Ngema.
"Ngiyakubongela dadewethu uNkulunkulu ulokhu eziveza kuwe," kusho uNeo Chuene.
Kuvela lezi zindaba nje uSimz uke waba sematheni nesoka lakhe uTino Chinyani kungacaci noma uthando lwabo bayaluvuselela noma bahlukene unomphela.
USimz ubavale umlomo abantu enameka izithombe ezikhombisa bengcebeleke olwandle kanti lezi zithombe bezilandela esike sanamekwa uTino ngesonto eledlule, siphelezelwa inhliziyo ekhombisa uthando.