USEFUNA ukugxila emahlayeni usomahlaya odabuka kuleli, uTrevor Noah, omemezele ukuthi useyashiya ohlelweni lwethelevishini, iDaily Show.
UTrevor, obeselushayele iminyaka eyisikhombisa lolu hlelo lwaseMelika lwethelevishini, umemezele lezi zindaba kulona lolu hlelo.
Enkulumeni yakhe uveze ukuthi ubona sekuyisikhathi sokuthi adede indawo kulolu hlelo futhi ubonga akaphezi ngokuba yingxenye yalo.
“Ngizizwa ngibusisekile ukuthi emuva kweminyaka eyisikhombisa sisebenzisane kahle. Ngifike kulolu hlelo ngiwusomahlaya ongaziwa muntu, oziphumela eNingizimu Afrika yize bengazi kahle ukuthi ngiyintandokazi yabo eMzansi,” kusho uTrevor.
Uphethe isimemezelo sakhe ngokubonga ababukeli beDaily Show nabamhloniphe ngokusukuma bamshayele ihlombe.
UTrevor akavezanga ukuthi lunini usuku lwakhe lokugcina nokuthi ubani ozongena esikhaleni sakhe.
Uveza lezi zindaba nje usanda kuveza ukuthi uzobuya eMzansi ngemicimbi yamahlaya engu-12 kusukela ngo-Agasti 31 kuya kuSepthemba 15 wonyaka ozayo.
Yize amathikithi eqale ukudayiswa ngoSepthemba 27 kodwa emicimbini yasePitoli kubikwe ukuthi imicimbi emibili kwemine, asephelile amathikithi akhona.
Njengoba imicimbi yaseMzansi izoba ngasekupheleni konyaka ozayo, lo somahlaya uzobe ezungeza umhlaba ngeminye imicimbi ayibiza nge#BackToAbnormalWorldTour.
Izolo ubeseToronto, eCanada, nalapho edayiswe wonke amathikithi omcimbi.