UMNDENI wowayengunozinti we-Orlando Pirates, udinwe uyaveva ngesenzo somculi kamaskandi, oqambe i-albhamu yakhe ngegama likaSenzo Meyiwa ngaphandle kwemvume yawo.
Lo mculi uGlama omatasa nezinhlelo zale albhamu engakatholakali ezitolo, kubikwa ukuthi akakaze ahlangane nalo mndeni okuthiwa uvutha ungabaselwe ngesenzo sakhe.
USfiso Meyiwa utshele Isolezwe ukuthi bamangele sebethola imibiko yokuthi kunomculi oqambe i-albhamu yakhe ngegama likamfowabo.
Uthe ngemuva kwalo mbiko, baphinde bathola ukuthi uGlama uhlela ukubonana nabo maduze.
“Bekumele aqale asithinte ngaphambi kokuthi anqume ukusebenzisa igama likaSenzo. Sesiludlulisile lolu daba kubameli bethu. Sizimisele ngokuthi siyilwe le mpi uma lo mculi (uGlama) engenzi ngendlela efanele,” kubeka uMeyiwa.
Ethintwa uGlama, uthe bahlela ukuhlangana nomndeni ukuze balungise lolu daba.
“Iyafana necala into esiyenzile. Yingakho sihlela ukuyobonana nomndeni ngaphambi kokuthi iqale ukudayisa i-albhamu. Sizobe sesizwa ngawo ukuthi silulungisa kanjani lolu daba. Okwamanje angizokwazi ukwanda kakhulu ngoba asikahlangani nomndeni wakwaMeyiwa,” kuchaza lo mculi.
Lo mculi uthe uhlela ukuthi i-albhamu yakhe iqale ukutholakala ezitolo ngoJuni.