U-DJ wodumo lwengoma Umlilo, uDj Zinhle (38), uveze ukunengeka ngabangene baze bagamanxa empilweni yakhe yezothando.
Kuchwaze izinkundla zokuxhumana muva nje, kusabalala izithombe zalo Dj nomngani wakhe, uNomuzi Mabena odume ngelika Moozlie nesihlabani somculi waphesheya weR&B ophinde abelinxusa logologo iRemy Martin, u-Usher.
Enkundleni yokuxhumana uX (okwakuwuTwitter) abantu bakhwele badilika kuDj Zinhle njengoba bebone sengathi ubesethe ne eduze kuka-Usher yize esegane owaduma kuBlack Motion, uMurdah Bongz.
UDj Zinhle uqale wangazigqizaqakala izinkulumo ezishiwo ngaye kodwa kuthe uma sekusabalala ividiyo yowesimame ebambene bedansa no-Usher kuyilapho lo Dj abhoke ngolaka ethi akuyena osesithombeni.
Phakathi kabaphawulile u@SibaDweba, uthe uyamuzwela futhi uyadabuka ngoBongz njengoba umkakhe ewotawotana nesilomo seR&B, u-Usher. UDj Zinhle uphendule wathi umuntu nomuntu akanake impilo yakhe futhi akuyena lona ovela esesithombeni.
“Ayi bafwethu anisazi nizokhuluma ngani tjo! Ngicela nibe bhizi ngempilo yenu. Akusimina lona obambene noUsher kodwake qhubekani nokukhuluma ngegama lami, ayi futhi nina,” kuphendula uZinhle.
Akukhona okokuqala uDj Zinhle ongowokudabuka eNewcastle, ephawula ngabazifaka ezindabeni zakhe. Engxoxweni abanayo ne-IOL ngonyaka odlule, waveza ukuthi yena usegxile emculweni, emabhizinisini nomndeni wakhe, wathi akudikizi ngisho inqulu uma kukhulunywa ngaye ezinkundleni zokuxhumana.