UBHEKWE ngamehlo abomvu uFreddie Jackson, eKZN njengoba ezonandisa ngeSonto ngo-5 ntambama, e-ICC Arena, eThekwini.
Abagqugquzeli be-You Are My Lady South Africa Tour, bathi amathikithi adayisa okwamagwinya ashisayo eTicketPro, ePayZone nasezitolo zakwaSpar. Banxuse abazimisele ngokuhambela ikhonsathi ukuba basheshe bathenge amathikithi ngoba inkundla ilayisha abangu-10 000.
Umgqugquzeli womcimbi eThekwini, uThulani Maphumulo weYonke Imizamo Productions, uthembise izithameli ukuthi kumele zilindele ubumnandi bodwa, nobusuku obugcwele uthando nomculo omnandi.
"Ngibe nenhlanhla yokuzibonela ngawami amehlo uFreddie Jackson enandisa eSun City Superbowl, ngoMgqibelo nangeSonto eledlule, naseThe Forum, eLos Angeles, e-USA nyakenye. Engingakusho nje ukuthi abalandeli bakhe baseKZN bazobhema bakholwe."
Ukuqinisekisile ukuthi amathikithi ahamba ngempela ezikhungweni eziwadayisayo.
"Ukuze abantu bagweme ukuphoxeka, kuzomele bawathenge ngokushesha. Ezinyangeni ezedlule, besinomcimbi eMgungundlovu, kuthiwa abantu ebebezama ukuthenga amathikithi bahlangabezana nezimmbila zithutha ngoba bebetshelwa ukuthi asephelile ngenxa yokuhlulwa ukuhlela.“
Ngaphambi kokuza eThekwini, lo mculi wodumo lwengoma ethi You Are My Lady, neRock Me Tonight, ngoMgqibelo uzoqala e-Emperors Palace eKempton Park.
UFreddie uthe ukujabulele ukuzonandisa kuleli okokuqala ngqa empilweni yakhe.
"Ngizwe izindaba eziningi ezimnandi ngalelim zwe elihle nokuthi abantu baseMzansi bawuthanda kanjani umculo wami,“ kusho uFreddie.
Ezingomeni okulindeleke ukuba uFreddie angaphumi esteji engaziculanga kubalwa ethi Rock Me Tonight, You Are My Lady, All I Ever Ask, Have You Ever Loved Somebody, Tasty Love namanye amanoni.
UThulani uthe uFreddie uzobe eshiyelana inkundla nezihlabani zakuleli, okunguZonke, Sjava, DJ Yung, Ismail Ibrahams noMashata. Ephetha uThulani uthe amathikithi abiza uR450 noR1150 eTicketPro, PayZone nasezitolo zakwaSpar kuzwelonke.