KUBE yinjabulo yodwa amaciko aKwaZulu-Natal edla umhlanganiso emqhudelwaneni wamazwe ase-Afrika, iShinning Star Africa Awards, obuseCotton Lounge, eSandton eGoli ngoMgqibelo.
Intokazi eyaqopha umlando ngokuba wuDJ wokuqala wesifazane ukuhlukanisa unyaka oKhozini ngo-2021, uHlosiwe "DJ Hlo" Mthalane yaseSeaview, eThekwini, ikhale yemuka nomklomelo iBest Star Club DJ of the Year, enenebula uMonatz noDJ Charlz waseTanzania noDJ Nelz (okungatholakalanga ukuthi owakuliphi izwe).
U-DJ Hlo uthe uzizwe ebalulekile ngokumela iNingizimu Afrika emncintiswaneni wezindondo njengoba beyiqhudelana namanye amazwe.
"Ukunqoba kwami kusho ukunqoba kwabo bonke oDJ bakuleli, ikakhulukazi besifazane.
Ngiyafisa lokwesekwa okungaka engikuthola ngaphandle ngikuthole nalapha ekhaya.
Ngifisa ukubonga kakhulu umndeni wami ngokungeseka nomyeni wami ongumphathi wami, uDkt Musa Zulu weMaz Entertainment ngokuhlezi engibonisa indlela endimeni yezokungcebeleka," kusho uHlo oshiye izithameli zalo mcimbi zisahalela impinda ngekhono lokuklwebha amapuleti. Uthe ukusina kwakhe lendondo lukhulu ngoba unethemba lokuthi kuzomvulela iminyango eminingi emazweni ase-Afrika naphesheya kwezilwandle.
"Okungijabulise kakhulu ukubona abantu basemazweni ase-Afrika bemi ngezinyawo bethokozela ukunandisa kwami ngendlela emangalisayo," kuphetha uHlo oseke wamela i-Afrika kumaZikomo Afrika Awards eZambia nyakenye.
Nomlingisi wodumo kuZalo nakwiThe Queen, uThabsile Zikhali waKwaMashu, akawuvali umlomo emuva kokuhlabana emkhakheni weBest Star Actress of the Year, ehlula uFranciar Msiska waseZambia, uCarine Pala waseCongo noHalima Yahya waseTanzania.
Uthe uzizwa ethobekile futhi ebusisekile ngokuklonyeliswa ngale ndondo.
"Noma wubani ongaziyo, uyazi ukuthi ngisaqokwe futhi nganqoba emazweni angaphandle kuphela. Lokho kusho ukuthi ngiyaqala ukubungazwa ngisekhaya.
Ngakho ngibusisekile ngokuthulelwa isigqoko ezweni lami. Emacikweni wonke ngithi qhubekani nokusebenza ngokuzikhandla ngoba kuyothela izithelo ngolunye usuku," kusho uThabsile.
Umculi kamaskandi waKwaNongoma, uSipho "Magic Voice" Zulu, uhlabane emkhakheni weBest Star Artist of the Year, equmba phansi uFoby waseTanzania, uLortonio waseLiberia noLioness waseNamibia.
UMagic Voice, owine ngengoma ethi Isilungu, uthe lokhu kuchaza ukuthi nomculo kamaskandi sewubalwa nezinhlobo ezingungqaphambili e-Afrika jikelele.