OSAZIWAYO baseThekwini bazokhuthaza intsha yaseMariannhill, ePinetown, kwiYouth Own Your Power ehholo lakwaMamdekazi,iDassenhoek Hall, ngoLwesihlanu kusukela ngo-10 ekuseni. Emacikweni azobe eshiyelana inkundla kubalwa isihlabani segqom', uDladla Mshunqisi, uMs Level wodumo kwiLion King nomethuli wezinkulumo ezakhayo, wodumo lwencwadi ethi I Was Raped, You Were Born. Umdidiyeli walo mcimbi, uNelly Mkhize weNellie M Foundation, uthe bazobe begqugquzela intsha ukuba yenze umsebenzi wezandla ukuze ikwazi ukuzimela.
"Lo mcimbi owokubungaza intsha ekade ifundiswa umsebenzi wezandla. Kade ifundiswa ukushintsha izicathulo ezindala zibe zintsha. Ukwenza amavasi, imigqomo kadoti nokunye okuningi. Izoklonyeliswa nangezitifiketi."
Uthe kulo mcimbi kuzophinde kubekhona abazobe becushisa izingane ezenza umatikuletsheni ngezifundo abangazifundela. Kubaculi abazonandisa kubalwa uSazified noJason J. Esephetha, uNelly uthe akuzogcina ngosaziwayo kodwa nabendawo bazothola ingqayizivele yethuba. Izethameli zizobe zingena bhusende.