UNONTANDAKUBUKWA wakuleli odume ngokugqoka kancane aveze izinqa uNonhlanhla Queen Skolopad Qwabe umemezele indumezulu yomcimbi aveze ukuthi kuzobe kungowokubeka kwakhe phansi izintambo zodumo lwakhe. Lokhu kulandela ukuthi esanda kumangaza abalandeli bakhe ngesonto eledlule enameka izithombe eziveza ukuthi ukhulelwe eshuthe nangezingubo eziluhlaza. uSkolopad ezinsukwini ezedlule unameke isithombe sosana kodwa wangacacisa ukuthi yinganeni. Lezi zindaba zithakaselwe abaningi bembongela.
Muva nje unameke ividiyo ekhuluma ngomcimbi azovalelisa kuwo njengoba eveza ukuthi usezobhekana ngqo nokuba umama. " Ngizolivala ngokugcwele ikhasi likaQueen Skolopad njengoba sengizoqala impilo entsha kaNonhlanhla Qwabe. Ngizokhulisa ingane yami yomfana njengomuntu ozelwe kabusha nomnene," kusho uSkolopad.
Iningi labantu lilokhu limhalalisele njalo liyameseka nangesinqumo sakhe.
" Ezinye izinto kumele sizidele ngenxa yabantwana bethu," ekhuthazwa uGraceladygee. USkolopad akagcini nje ngokuba unontandakubukwa kodwa uwumculi, nomhlengikazi ofunde wagogoda kweminye yemikhakha yezempilo.
