OYISOKA likaNonku Williams weThe Real Housewives of Durban ekhonjiswa kwiShowmax nakuMzansi Magic, uDumisani “Rough Diamond” Ndlazi, usolwa ngobeyintombi yakhe ngokubaleka noR23 000.
UNksz Zama “Thelile” Zulu waseAquadene, eRichards Bay, utshele Isolezwe NgoMgqibelo ukuthi uDumisani waboleka kuye lesi samba kusukela ngo-2021. Usola uNdlazi ngokunqwaha nemali amkweleta yona elinganiselwa kuR23 000.
UThelile uthe wayethandana noDumisani ngo-2020 kodwa babuye bahlukana emuva kokuba umjolo wabo ubanjwe ngunkosikazi kaDumisani.
“Nganquma ukuthi sihlukane ngoba umfazi wakhe wayelwa. Ngisho sesihlukene saqhubeka saxoxa nje, sishayelana ucingo futhi.” UThelile uthe uDumisani wabe eseboleka isamba sikaR15 000 ngoMashi 2021, ezoshesha asibuyise.
Uthe uDumisani wabuye wabuya waboleka uR5 000, maqede walandelisa ngoR3 000, uThelile awuthatha kumashonisa waseSikhawini.
“Bengimazi njengomuntu owusomabhizinisi, yingakho ngamthemba ngemali yami.”
Uthe sebebuya nasenkantolo noDumisani ngenxa yalesi sikweleti. Eqhuba, uThelile uthe kumcasule kabi esebona ethengela uNonku unyanyavu lwemoto ekubeni ehlulwa ukubuyisa uR23 000. Uthe umbuzile ngoWhatsApp ukuthi kungani engayibuyisi imali yakhe kodwa wamziba. UThelile uthe uDumisani wazivumela yena enkantolo yaseRichards Bay ukuthi uzomkhokhela le mali ngo-2021.
Uthe ubuyelile enkantolo eyoyazisa ukuthi uDumisani unqwahile nemali, yathi akathole lapho ehlala khona ezodlelwa impahla yakhe. Eqhuba, uthe usehamba ethuka izanya ngoba uDumisani useke wamsabisa nangezinkabi.
Eziphendulela uDumisani, uvumile ukuthi wake wajola noThelile ngo-2019 nango-2020, kodwa wamala ngenxa yokuthi wayeseluhlaza kuye. Uthe baya enkantolo futhi bavumelana ngodaba lwemali, yonke into yalungiswa. Usole ukuthi uThelile usenomona njengoba eseqhubekele phambili nempilo futhi usefuna ukudicelela igama lakhe phansi.
“Mina naye siyakhuluma nje kahle. Kuwo nje futhi lo nyaka kade ngimsiza ngemali yokuqasha indlu.
“Ngike ngamsiza futhi nangemali kaphethroli ngesikhathi eya eGoli. Nakhona nguye osuke engishayelile ucingo, ecela usizo,” kuphetha uNdlazi osabise ngokuthathela izinyathelo zomthetho uThelile ngokungcolisa isithunzi sakhe.
Imizamo yokuthola ukuphawula kukaNonku ayiphumelelanga ngoba ucingo lwakhe belungabanjwa futhi kuze kwashaya isikhathi sokushicilela engakawuphenduli umyalezo athunyelelwe wona.