IBHEKWE ngamehlo abomvu impi yesibhakela phakathi komculi wokholo, uBetusile Mcinga nomsakazi woMhlobo Wenene, uMafa Bavuma e-Orient Theatre, e-East London ngoSepthemba 25. UBetusile yisihlabani somculo wokholo sodumo lwengoma ethi Uzundithwale, esake sahlabana ngomklomelo weBest Song of the Year kumaCrown Gospel Awards kanti uMafa ngumsakazi wohlelo lwasekuseni kuMhlobo Wenene, iBreakfast Eyondlayo Ekuseni.
Ngokusho komgqugquzeli womqhudelwano wosaziwayo abangabangani abakhulu, uGeorge Meko, inhlosongqangi wukuba uBetusile noMafa bazane kangcono.
"IBattle of Personalities izojabulisa abalandeli bakaMafa Bavuma nabakaBetusile Mcinga njengoba kungabantu abangenawo amava esibhakeleni. Cabanga ukuthi izobe ihlekisa kanjani? Impikiswano eqhubeka ezinkundleni zokuxhumana, ngokuthi yimuphi ongcono kunomunye izophela eringini," kusho isitatimende esifushane ngempi. Izithameli zizoqala ukuzitika ngomcimbi kusukela ngo-2 emini kuze kulamule u-8 ebusuku. Kuzobuye kunandise uNaakMusiQ, Berita, ZainSA, King Jade noBaby Joe. Ngaphambi kokuba uBetusile noMafa bahluthane ngesibhakela, bazoqala bavike imikhonto yamazwi njengoba kunosomahlaya abazozitika ngabo kwiRoast of Mafa Bavuma & Betusile eBuffalo City TVET College, e-East London ngoSepthemba 23, kusukela ngo-6 ntambama. Lezi zinsizwa zizobe zidweshulwa phambi kwezithameli nguKhanyisa Bunu, Siya Seya, Ntsika Sqhazolo, Reggie Solani, Tsepiso Ndzayo, Lonalinamandla Bawuti, Zimvo Mpahleni, Mira Natasha noCastino.
Amathikithi okuthamela iRoast of Mafa&Betusile aseyatholakala kumaComputicket ngoR200 nangoR300. AweBattle of Personalities abiza uR350.