INTAKA ibekelwe amazolo kwiJammin 2 Soccer ezinkundleni zemidlalo zase-University of Johannesburg (AW Muller Stadium), eGoli ngeSonto kusukela ngo-11 ekuseni. Kulo mqhudelwano webhola losaziwayo kuzobe kugijimisana iqembu likamaskandi eliholwa wuKhuzani Mpungose, ele-hip hop eliholwa wuBig Zulu, elegqom’ eliholwa wuDJ Tira nelomculo wokholo eliholwa wuDumi Mkokstad.
UKhuzani uthe kulo nyaka abazodla umhlanganiso bazokhala bamuke nesamba sikaR250 000 bese abalale isibili bahlomule ngoR100 000.
“Kanti kulabo abangezokuya emzuliswaneni wamanqamu ababuyi ngonyaka ozayo. Kuzofakwa omunye umkhakha omusha unyaka nonyaka njengoba kulo nyaka kufakwe i-Gospel. Ukungasali kwi-tournament sekuzodlalelwa nakho. Umbuzo uthi wubani ongabuyi ngonyaka ozayo,” kubuza uKhuzani.
Umdlalo wokuqala ngo-11 ekuseni, uzobe uphakathi komrepha nomaskanda bese owesibili ube ngo-1 emini phakathi kweqembu legqom' nabaculi bokholo.
UKhuzani unxuse abalandeli bomculo kamaskandi ukuba basheshe bathenge amathikithi bese betheleka ngobuningi babo enkundleni ngabo-10 ukuze uqale umdlalo ngo-11 sebegcwele benyinyitheka enkundleni.
Amaqembu adle umhlanganiso azotholana phezulu emzuliswaneni wamanqamu ngo-5 ntambama. Ngonyaka owedlule lomncintiswano wawinwa yiqembu likamaskandi, liqumba phansi omrepha ngamabili eqandeni. Umdlalo wokuqala wawuphakathi kweqembu le-hip hop nelegqom', kwawina ele-hip hop ngamagoli amathathu kwamabili. Umdlalo wesibili wabaphakathi kweqembu likamaskandi nela-mapiano elaliholwa nguKabza De Small, kwahamba phambili elikamaskandi kumaphenathi emuva kokubambana ngelilodwa ngapha nangapha. Omaskanda baklonyeliswa ngesamba sikaR100 000 kwathi iqembu le-hip hop lathola uR50 000.
Abaphuma ekuseni banikezwa uR25 000, iqembu ngalinye. Kumaskandi kulindeleke uReggie Ndlovu, Tshatha Ngobe, Qhoshangokwenakwakhe, Kwazi Nsele, Njoko nabanye. Kwi-hip hop kukhona uKwesta, Cassper Nyovest, Blxckie, Sjava, Tbo Touch nabanye kanti emculweni wokholo kukhona uSgwili Zuma, Ntokozo Ngongoma, Jumbo, Ga Ndlela, Melusi Mbokazi nabanye.
Nyakenye kwakuqala ngqa kubonakala umrepha ongasekho, uAKA, ejabulelana nobeyimbangi yakhe, uCassper Nyovest njengoba babeseqenjini lomrepha. Lemidlalo, exhaswe ngabe Hollywood Bets, Icebolethu nabeScore, izobe isakazwa bukhoma kuSABC TV noma kwi-SABC+ App.
Abafuna ukuzibonela bukhoma lamaqembu eqhuthana amazenze bengazihlinzeka ngokuthenga amathikithi Webtickets/Pick n Pay nakwiComputicket/Shoprite, kukhona elikaR100 nelikaR250.