ZITHAKASELWE abaningi izindaba zokukhulelwa komunye wabalingisi bakuleli okuvele ngomcimbi. UThembisa Mdoda Nxumalo, ophinde abe ngumethuli wezinhlelo zethelevishini, umangaze abaningi enameka izithombe ze-baby shower. Yize uThembisa engakubekanga kwacaca ukuthi ukhulelwe kodwa isisu siyazisho futhi kubukeka sengathi usezobeletha. Lezi zithombe zigabe ngemibala eluhlaza okwesibhakabhaka kusukela engubeni abeyigqokile nemihlobiso.
"Siyakubongela mama, ngiyakujabulela kakhulu. Siyabonga," kusho uJessica Nkosi. "Awu nkosi yami, ngiyakubongela mama. Zaze zamnandi lezi zindaba, uNkulunkulu akubusise nomndeni wakho," kusho u-Ayanda Thabethe. "Ngiyakubongela sisi. UNkulunkulu akubusise, nengane nobaba wayo," kusho uMrs Blue Nkosi. "Waze wamuhle, ngiyakubongela," kuncoma uMinnie Dlamini.
Kuvela izindaba zokukhulelwa kukaThembisa nje, izakhamuzi zakuleli bezisanda kubongisa umndeni wezinjinga zakwaMpisane emasontweni ayisithupha adlule. Lokhu kulandela ukuthi unkosikazi ka-Andile Mpisane, uTamia, enameke izithombe ezikhombisa ukuthi ukhulelwe futhi angase atete noma kunini.