ABACULI bakuleli bakuthakasele ukuthola ingqayizivele yethuba lokubhulela amazolo ingwazi yaphesheya kwezilwandle edume umhlaba wonke, uFreddie Jackson, emakhonsathini ayo akuleli. Kumaciko azoshiyelana inkundla nale nkakha yeR&B kwiYou Are My Lady South Africa n Tour kubalwa uZonke, Sjava, Mashaba, Ismail Abrahams noDJ Young. UZonke ngomunye wemizwilili ehlonishwayo kuleli nasemazweni angaphandle futhi usanda kukhipha i-albhamu esihloko sithi Embo.
Uthe ukujabulele kakhulu ukuba yingxenye yalolu chungechunge oluqala eSun City Superbowl ngoLwesihlanu nangoMgqibelo, ludlulele e-Emperors Palace eKempton Park ngoSepthemba 30 bese imbenge isongwa eDurban ICC ngo-Okthoba 1.
"Ngikuthokozele ukubamba iqhaza kulo mcimbi nokucula nengwazi uFreddie Jackson. Kuwukufezeka kwephupho kunoma yimuphi umculi osemusha. Ngikujahe kabi ukuba nesikhathi esimnandi nabalandeli bami futhi ngibathembisa ubumnandi abangasoze babukhohlwa," kuphetha uZonke.
USjava uthe igcagcele esokeni kuye ngoba ukhule elalela umculo kaJackson futhi akakaze azibona ngolunye usuku eshiyelana isteji neqhawe lakhe. "Ngesikhathi ngimenywa ukuba yingxenye yalo mcimbi, ayibanga yikho indlela yokuthi nginqabe. Ukuba nje esteji nale ngwazi nokuyinikeza isigqi somculo waseNingizimu Afrika yingqayizivele yethuba."
Amathikithi, okuthamela iYou Are My Lady South African Tour, asatholakala eTicketpro, Payzone, nasezitolo zaseSpar ngoR450 kuya kuR1150.