KUZOGQAMA ikhono loDJ besifazane emcimbini ohlelwe yiThongweni Events, wokubungaza abesifazane ngenyanga yabo.
Umcimbi uzobe useThe Zone Lounge, 88 Madondo Road, eClermont entshonalanga yeTheku, nakuba uhlelelwe abesifazane kodwa nabesilisa bamukelekile.
Indikimba yawo ithi Celebrating Women in You, uzokuba ngo-Agasti 26, uqala ngo-1 ntambama.
Phakathi koDj besifazane okulindeleke ukuthi bashiyelane inkundla kubalwa uLavida, Lihle, Dipsie noT-One. Kanti bakhona abaculi abazonandisa okubalwa uNdah J, nomculi wamapiano osezakhele igama, u-Aymos Shili.
Amathikithi okungena esangweni abiza uR150 kodwa abiza uR100 uma uwathenga ngaphambi kosuku lomcimbi kanti i-VIP ibiza uR250.
Bazophiwa amat-shirt abokuqala abangu-20 abazothenga kuqala amathikithi. Abazofika kulindeleke ukuthi bafake amabharethi emakhanda nezikhafu emqaleni.
UNksz Futhi Zondo, uthe bakubone kumqoka ukuthi bahlele umcimbi walolu hlobo. Wathi inhloso enkulu yawo ukunikeza abantu ithuba lokuba bazijabulise.
"Okuyikhona okumqoka ukubona abantu bendawonye futhi bejabulile. Sikholwa ukuthi lolu hlobo lomcimbi luzokwazi ukuthi lubajabulise abantu ebazobe befikile,'' kuchaza uNksz Zondo.
Uqhube wathi bakhethe ngamabomu ukuthi umcimbi bawuqondanise nenyanga yabantu besifazane. Wathi bayakholelwa kakhulu ekuthuthukiseni abembokodo ikakhulu abangabaculi.
Uveze ukuthi ngesikhathi bewuhlela bebehlose ukusingatha abantu besifazane bodwa, kodwa babuye babona ukuthi nabantu besilisa abafisa ukuba yingxenye, bamukelekile.
"Nabantu besilisa nabo bangawathenga amathikithi bazoba kanye nathi ngalolu suku olukhulu kangaka,'' usho kanje.
Uthe bamema bonke abantu baseClermont, ePinetown, eThekwini nabasuka kuzona zonke izingxenye zeTheku.