IZINKAKHA endimeni yomculo, u-Abigail Kubeka noYvonne Chaka Chaka, zizohlonishwa ngendondo yeSampra Lifetime Award ngomsebenzi eziwenzile endimeni yomculo emcimbini ozoba ngoMgqibelo amaBasadi in Music Awards.
Emcimbini ozoba seGallagher Estate Convention Centre, eJohannesburg, kulindeleke ukuthi kuhlonishwe abesifazane abasemikhakheni ehlukene.
Abahleli bawo baveze ukuthi kulo mcimbi wabo wokuqala bazohlonipha uYvonne no-Abigail ngegalelo labo emculweni wakuleli.
UHloni Modise-Matau ongumsunguli womcimbi uveze ukuthi igalelo labo emculweni ngeke lize lilibaleke kalula.
“UMama u-Abigail noMama Yvonne bashintshe umlando ngomculo wabo kuleli njengoba bevulele abesifazane abaningi amathuba, nababukela kubona besakhula. Sizizwa sithobekile ngokubanika lezi zindondo bobabili, njengoba namhlanje sijabulela izingoma zabesifazane ezihlukene, ikakhulukazi zesintu babe nesandla kulokho futhi siyabonga siyancoconza,” kusho uHloni.
Uveze ukuthi konke sekumi ngomumo ngomcimbi futhi sebekulindele ngabomvu ukubona abesifazane abazoba yingxenye yawo befika nemisiko yabo abazodlisa ngayo kukhaphethi obomvu.
Uthe uhlelo lomcimbi luzobe luphethwe uNomuzi Mabena no-Anele Zondo.
Emcimbini isifundazwe iKwaZulu-Natal kulindeleke ukuthi sibuye nezindondo ezingaphezu kwezimbili, njengoba u-DBN Gogo noNomfundo Moh behamba phambili ngokuqokwa.
Intokazi yasePitoli ecula umculo wama-piano uPabi Cooper nayo yaqokwa kaningi kulo mcimbi.
U-DBN Gogo uqokwe emunxeni we-Artist of the Year, DJ of the Year neSong of the Year ngengoma yakhe ethi Bambelela.
UNomfundo Moh uqokwe emunxeni weKaya959 Afropop Artist of the Year, Artist of the Year neSong of the Year ngengoma yakhe ethi Phakade Lami.