KUGQASHUKE igoda phakathi kukaSlenda Da Dancing DJ, nesithandwa sakhe uSenzo “Msenzisto” Shezi wase-Afrotainment. Kuthiwa uSenzo ubefuna ukuthi bathole ingane noDJ, wanqaba.
Ngokomthombo weSolezwe ngeSonto ongaphakathi e-Afrotainment uthe: “USenzo obengenangane ubecela ukuthi uSlenda akamenze indoda amtholele ingane, ekhala ngokuthi iminyaka iyahamba engenayo ingane. Ngakolunye uhlangothi uSlenda ubebona ezophazamiseka ezinhlelweni zakhe zokuthuthukisa umsebenzi wakhe wokuba nguDJ njengoba esanda kuphuma eqenjini labadansi base-Afrotainment, Amadada,“ kulandisa umthombo.
Uqhuba umthombo uthe, uSlenda wenza kahle ekuklwebheni amapuleti, akafuni lutho oluzomphazamisa.
Umthombo osondelene nabobabili uthe awazi bazosebenza kanjani ngoba uSenzo uyiMenenja yase-Afrotainment kanti uSlenda usenguDJ wakhona. Akwaziwa noma lokhu kuzowuphazamisa yini umsebenzi kaSlenda.
Ukungamukeleki kwesicelo sikaSenzo kuthiwa kwenze wathatha isinqumo sokhululelisa omunye wesifazane. Kumanje kunesithombe esisabalalise okomlilo wequbula esifakwe nguSenzo ephethe ingane ezinkundleni zokuxhumana, kubonakala ukuthi uhlulwa nawukuzibamba yinjabulo.
USlenda kuthiwa ubeseneminyaka ethandana noSenzo. Kuthiwa ubengazimisele ukuthola ingane yesibili ngoba uthandane noSenzo esenayo ingane.
Ethintwa uSlenda ngodaba uthe, uyakweshwama okwengane obekuthiwa akayithole.
“USenzo uzithathele isinqumo sakhe nami ngakhetha impilo yami. Angikwazi lokhu okunye okhuluma ngakho,” kusho intokazi.
USenzo utshele iphephandaba ukuthi alibuyele kumthombo walo, uphendule kukho konke ekufunayo.