UKUKHULELA kwaHluphiwe eMsinga kungenagesi akulishabalalisanga iphupho lakhe lokuvelela kwezobuciko osanda kuthola indawo ayilingisa emdlalweni owuchungechunge iSmoke & Mirrors.
USifundo Dladla (29) uthe yize ebengakwazi ukubuka ithelevishini njengoba ugesi uze waqala ukubakhona ngakubo ngo-2018, akaphelanga amandla okufeza iphupho lakhe. Uthe ngisho ontanga yakhe bebephela yinsini uma ebatshela ukuthi ufuna ukuba ngumlingisi bemtshela ukuthi akekho umlingisi wethelevishini abamaziyo oqhamuka eMsinga.
Usanda kuthathwa kwiSmoke & Mirrors kwi-e.tv okungumdlalo wokuqala aqashwe ukulingisa kuwona isikhathi eside njengoba uwuchungechunge.
Uthe ithelevishini ubegcina ngokuyibona uma evakashele unina ohlala eGoli.
“Into eyangigqugquzela wukubuka imidlalo yethelevishini ebiveza indawo yala kuhlala khona umama. Ngenxa yokuhehwa wukuthi kuvela izindawo engizaziyo kwithelevishini, kwenza ngaba nothando lokulingisa. Ngaqala ukulingisa ngo-2015 kodwa bengithola imidlalo engadumile kakhulu ngiphinde ngidlale phambili nakumafilimu amancane.
“Nakhona bengibuye ngiphelelwe amandla ngoba bengibona ukuthi izinto aziyi phambili ekulingiseni kodwa indlela ebengimukelwa ngayo uma ngiqhamuka emphakathini ibiyenza ngibone ukuthi kukhona abayithandayo lento engiyenzayo.
“Ngigcine sengizama inhlanhla nasemidlalweni yethelevishini emikhulu. Nakhona benginikwa indawo encane isheshe iphele kwaze kwaba ngithola iSmoke & Mirrors,” kusho uSifundo.
Kulo mdlalo uSifundo udlala indawo yephoyisa. Phambilini uke walingisa kwifilimu encane yoMzansi Magic iMkhulu, kwaba yifilimu emfishane yakwaSABC1 iFatherless. Ngo-2017 wavela kancane kwiGold Diggers kwi-e.tv, kwaba wumdlalo womoya kuKhozi FM, umdlalo woMzansi Magic iPastor Bae.
Ngaphandle kwayo waphinde wathi xinti kwiGomora lapho adlala khona isikhashana indawo kaNew Guy. Eminye imidlalo ake aba kuyona iPhela Lase Vosloo, ifilimu iDelani, ifilimu Ugogo Wabantu.
Ngaphandle kokulingisa, uSifundo uphinde aziwe ngokudayisa ilebuli yakhe yempahla yokugqoka iTypical Zulu.