ABALINGISI bomdlalo okhiqizwe yiBomb Productions iShaka iLembe bazihole phambili ngokuqokwa kakhulu eminxeni eyahlukene yabalingisi nabakhiqizi bamafilimu nemidlalo yethelevishini kumaSimon Mabhunu Sabela KZN Film and Television Awards okwethulwe amaciko aqokwe kuwona izolo eCoastlands Skye Hotel, eMhlanga, eThekwini.
Kubalingisi beShaka iLembe abaqokwe kakhulu kulo mncintiswano osubuya ihlandla leshumi nanye kulo nyaka, uThembinkosi Mthembu noWiseman Mncube kwi-Best Actor, Nomzamo Mbatha kwi-Best Actress, Dawn Thandeka King noHope Mbhele kwi-Best Supporting Actress TV, Ntando Zondi kwi-Best Newcomer Actor noZiya Xulu kwi-Best Newcomer Actress.
Ekhuluma neSolezwe emva komcimbi, uNtando (16) waKwaMashu, ofunda uGrade 11 eGlenwood High, uthe ukuqokwa kwakhe kulo munxa kukhombisa ukuthi umsebenzi awenzile nawenzayo muhle, futhi kuyamkhuthaza ukuthi azimisele.
“Lokhu kukhombisile ukuthi imizamo yami iyabonakala ngakho ngiyazibongela kakhulu ethimbeni ebelihluza imingenelo ngokungibona ngifanelwe ukuqokwa kulo munxa. Sengibheke ukuqhubeka ngizikhandle emidlalweni engisazobonakala ngilingisa kuyona nesengiqalile ukuqopha kuyo,” usho kanje.
Omunye wabalingisi abaqokiwe kwi-Best Actress TV, ngendawo kaMaMzobe ayilingisa kuMkhokha: The Curse, uDeli Malinga uthe lokhu kufakazela ukuthi ukubekezela kuthela izithelo njengoba eqokwe ngendawo ephambili, obekungokokuqala eyilingisa phezu kweminyaka engaphezu kwa-20 elingisa.
“Ngisizwe wukuthi ekulingiseni angingenelanga udumo nemali. Lo msebenzi ngiwenza ngoba ngiwuthanda yingakho ngikwazile ukumelana nobunzima nokungachumi ngokushesha, nakhu manje sengivuna izithelo ezibonakalayo ngalokho,” kusho uDeli.
Owophiko lwezokumaketha eKZN Film Commission, okuyiyo ehlela lezi zindondo, uMuzi Ngcolosi uthe kulo nyaka bangeze iminxa emibili ebingekho eminyakeni edlule okungoweBest Production Design noweBest Cinemotography, lokho kwenza iminxa yaba wu-23 uma sekuhlanganiswa nowe-Lifetime Achievement Award.
Uthe lokho bakwenza ngoba bese kukaningi abantu bekhala ngokuthi kayanele iminxa eqhakambisa abenza imisebenzi engagqamile nengabadumisi, engekhona ukulingisa.
“Okunye okuhlabahlosile wukuthi senze umunxa owodwa ozovotelwa ezinkundleni zokuxhumana weBest Reality Show, lapho ababukeli bevotela uhlelo abaluthandayo, bese olunqobile silumemezela ngosuku lomcimbi wokuklomelisa abanqobile,” kusho uNgcolosi.
Isiyonke iminxa yomncintiswano yi-Best Actor TV, Best Actress TV, Best Supporting Actor TV, Best Supporting Actress, Best Actor Film, Best Actress Film, Best Supporting Actor Film, Best Supporting Actress Film, Best Director, Best Pan African Film, Best IsiZulu Film, Best Micro Budget Film, Best Feature Film, Best Screenplay Film, Best Newcomer Actor, Best Newcomer Actress, Best Use Of Cinematography, Best Production Design, Best Use of KZN As Filming Location, Best Documentary Short Film ne-Best Documentary Feature Film.
Umcimbi wokuklomelisa abanqobile uzoba sePlayhouse Theatre, eThekwini ngoJulayi 20 ngo-7 kusihlwa.
