UMA ungumuntu othanda opopayi, ezobuchwepheshe nezilwane, impela uzoyithakasela ifilimu, iThe Wild Robot.
Le filimu, esuselwe encwadini ka-Peter Brown, izibukeli zitshengise ukuyithakasela njengoba ibiqhakambisa uthando, ukuthembeka nobumbano.
Le filimu, edlala ihora elilodwa nemizuzu engamashumi amane nanye futhi elungele ukubukwa yizingane ezineminyaka eyisikhombisa kuya kweyisishiyagalolunye, ibikhonjiswa okokuqala eSter Kinekor eGateway, eThekwini, ngeSonto ngaphambi kokuthi ibonwe ngabantu bonke njengoba izoqala ukukhonjiswa ema-cinema ngoSepthemba 20, 2024.
Izibukeli zamukele le filimu ngenkulu inhlokomo njengoba zibone ukusebenzisana nokunakekela okutshengiswe nguRozzum 7134 (okuyirobhothi elidlalwa yinkakha yomlingisi ozinze phesheya kwezilwandle, uLupita Nyong'o) ngesikhathi ehlanganisa izilwane zasendle ukuthi zisebenzisane ngesikhathi bebhekene nobusika, ezakhela indlu yokukhosela aphinde atshale ukuzethemba ehansini elikhule lingenabo abazali, lingakwazi ukubhukuda nokundiza.
Ukunaba kancane ngale filimu, uRoz kumele akhulise uBrightBill oyihansi (odlalwa ngu-Kit Connor) njengoba uRoz abulala abazali bakhe ngephutha esizwa ezinye izilwane esiqhingini.
Engikuthandile ngefilimu ukuthi ayikhethi ukuthi umdala noma umncane, izimfundiso ezikuyo zikhuluma nawo wonke umuntu.
Ezinye zezimfundiso wukugqugquzela ukuthandana kwabo bonke abantu noma ngabe abaqhamuki ezinhlangeni ezifanayo.
Ngokwale filimu, amalungu omndeni akudingi ukuthi kuze kube abantu ozalwa nabo noma babe uhlobo olufanayo. Ukuba yingxenye yomndeni kumayelana nothando, ukwethembana nokwethembeka.
Nakuba uRoz engaphefumuli futhi engadli, ubonakala “ephila” kakhulu. Unemizwa kanye nomuzwa wemvelo wokuqonda impilo yasesiqhingini ayifunda ngokubuka izilwane. Nakuba futhi eyirobhothi elakhiwe, uRoz ubuye abe nekhono lokuzwa ububele, uzwelo nothando.
Nakuba ekuqaleni kwale filimu abanye babemesaba uRoz futhi bengamfuni kodwa ngesikhathi kufika isikhathi sokumsiza ekuthathweni kwakhe, wonke umuntu wangenelela. Lo muzwa wokubambisana wenza bonke abantu basondelana futhi bafana nomndeni.
Khonamanjalo uBradley Lopan, obengomunye wabebezobuka le filimu, ekhuluma neSolezwe, uthe ifilimu imthintile.
"Bengingazi ukuthi amarobhothi angaba nemizwa emihle kangaka enamathele ezilwaneni nokuthi kufanele njalo uthande umama wakho ngoba lokho kukusiza kukho konke," kusho uLopan.
Uthe nakuba uRoz wabulala abazali bakaBrightbill kodwa batshengise ukuzwana okukhulu njengomama nendodana, wathi uBrightBill ubengeke afinyelele la efike khona ukuba uRoz wayengekho empilweni yakhe.
Isilinganiso engisinika ifilimu i-The Wild Robot ngu-10/10.