KULINDELEKE izinguquko ezinqala kuKhozi FM njengoba ngesonto elizayo luzomemezela ukushintshwa kwezinhlelo.
Engxoxweni Isolezwe elibe nayo nemithombo yalo, iveze ukuthi uBheka Mchunu noNkosinathi Mshengu bazokhishwa ohlelweni abalwenza ngoMgqibelo iS’giya Ngengoma. Lolu hlelo kuthiwa seluzoshayelwa ngabasakazi abasha.
Imithombo ithe omunye obonakale kwinhlolokhono wumsakazi kamaskandi weZululand FM, uNonhlanhla “Mdonso” Ngcobo.
Abanye abamataniswa noS’giya Ngengoma uTshatha Ngobe, Ngizwe Mchunu noZimdollar Biyela.
Olunye abathi luzothinteka, ngolwenziwa uVukile Nongcebo McKenzie, osekhonjwa ohlelweni lwasekuseni, iVuka Mzansi, kuthi abelwenza, iSithakela Isizwe, kuthiwa seluzoshayelwa uBheka Mchunu. Imithombo iveza ukuthi uBabheka Mthethwa obedidiyela olukaNongcebo uzobuyela ohlelweni olwenziwa uDudu Khoza, iJabul’ uJule.
NgoMsombuluko nangoLwesibili lo msakazo bewusingethe inhlolokhono yabasakazi nabadidiyeli.
Isikhala somdidiyeli sivuleke ngemuva kokushiya kukaSma Mbatha ohlelweni lwantambama iWoza Nabangani Bakho nakolukamaskandi iS’giya Ngengoma.
“USthandwa Gama, odume ngesibongo sakwaNzuza ucele ukukhululwa ezinhlelweni zakhe zasebusuku njengoba esenomndeni wakhe,” kuchaza umthombo.
Umphathi obambile woKhozi FM, uSbongi Ngcobo, ukuqinisekisile ukuthi izinguquko bazozimemezela ngesonto elizayo.
NgoLwesibili okhulumela iSABC, uKaizer Kganyago, ubehambele kwaSABC eThekwini ukuyohlangana nabezindaba ukuthi badingide nanganoma yingani ethinta le nhlangano.
UMETHULI wohlelo lwezingxoxo iSithakela Isizwe kuKhozi FM, uNongcebo McKenzie ukhonjwa ohlelweni lwasekuseni phakathi nesonto iVuka Mzansi noDJ Sgqemeza
Uveze ukuthi iphelile indaba yokuthi abasakazi bathole izinkontileka zeminyaka emithathu emsakazweni, kwabuyelwa kweyonyaka owodwa.
Leli phephandaba lihabule ezithi imiholo yabasakazi ayinyuswanga. Lokhu kungenxa yokuthi le nhlangano izama ukuguqula isimo sayo sezimali esingesihle. Kuvela ukuthi lokhu kucishe kwaphazamisa izinhlelo njengoba kunabasakazi abagcine behudula izinyawo.
UKaizer uvumile ukuthi isimo sezimali asisihle kodwa hhayi ukuthi sekukubi kakhulu. Uwachithile amahlebezi okuthi lokhu kuzovimba ukuthi baqashe abasakazi abasha bangaphandle.
Ngesikhathi kusekhona owayeyisikhulu esiphezulu, uHlaudi Motsoeneng, kwaqala uhlelo lokuthi abasakazi bathole izinkontileka zeminyaka emithathu.
Umphathi woKhozi FM kodwa obambe kwesokuphatha iSABC KwaZulu-Natal, uBonga Mpanza, ubuzwe ngobudlelwano bakhe nomphathi wezinhlelo uZandile Tembe, njengoba kuthiwa abubuhle nokuthi kungani engamkhethanga ukuthi abambe ekuphatheni Ukhozi njengoba enza ngokudlule.
Uphendule wathi ngesikhathi kusekhona uMu Ngcolosi, uma engekho babebamba noZandile.
UKaizer uthe uMpanza akasithathi yedwa isinqumo sokuthi wubani ozobamba kodwa usebenza nabaphathi bakhe.
“Uma nilokhu nilwa nodwa, nizolimala nonke. Futhi sizonixosha nonke sifake abantu abasha,” kusho uKaizer.