YIZE indawo ayilingisayo ingenye yezisematheni kuMkhokha: The Curse, muva nje kodwa kuvela izindaba zokuthi usewushiyile lo mdlalo, u-Angel Zuma.
Le ntokazi edlala indawo kaNomkhosi Mthembu kuMkhokha kuthiwa isithole amadlelo aluhlaza njengoba isijoyine i-The Lion King, eCanada.
Ngokuthola kweSolezwe Ngempelasonto, kuthiwa u-Angel akazange acabange kabili ngesikhathi ethola leli thuba. Kuthiwa ube ukusayina inkontileka neThe Lion King wase azisa ophrojusa boMkhokha ukuthi useyashiya.
“Noma engashiyile kabi kodwa ophrojusa bebengakulindele ukuhamba kwakhe. Beziseningi izinhlelo abanazo ngaye ukukhulisa indawo yakhe. Kumanje njengoba edlala indawo yokuba ngunkosikazi kaKhulekani Mthembu aseqembuke naye basungula ibandla labo elisha lamaJudiya, inhloso bekungukukhulisa indawo yakhe nabukeka enza kahle kuyona,” kusho umthombo.
Izindaba zokuhamba kwakhe ziqinisekiswe nawuPortia Hlongwane woMzansi Magic.
“Yena usehambile kuMkhokha: The Curse. Usavela kuwona ngenxa yokuthi ezinye iziqephu azilingisayo ubevele esezishuthile. Okwamanje ayikakabikhona into ecacile ukuthi kuzokwenzekani ngendawo abeyilingisa kaNomkhosi. Konke kuzocaca kahle ngo-Okthoba ukuthi kwenzekani. Bezingekho nezinhlelo zokuthi iqedwe ngoba akekho obelindele ukuhamba kwakhe. Kungenzeka ukuthi uma kukhona iziqephu okudingeka ukuthi azishuthe acelwe azoshutha zona bese eqhubeka nomsebenzi wakhe kwiThe Lion King,” kusho uPortia.
U-Angel owaqeqeshwa ekulingiseni eKCap, uqale ukubonakala kuZalo edlala indawo kaZethu wagcina esethole ekaNomkhosi kuMkhokha: The Curse.
Uke alingise nasemidlalweni yeshashalazi aphinde aziwe nangokuba wumculi.
Ngesonto elizayo kuthiwa kungenzeka kube nenhlolokhono yokuthungatha ozovala isikhala sika-Angel kuMkhokha kodwa akukaqinisekiswa.
UPortia uthe umfisela inhlanhla u-Angel futhi ubonile ukuthi ujabule kangakanani ukuthola ithuba lokuyolingisa kwi-The Lion King. Lo mdlalo uvamise ukujikeleza eNorth America nakwamanye amazwe, futhi uhlala uyiphupho lawo wonke amaciko ukuthi alingise kuwona.