INKAKHA yomlingisi yase-USA edume kakhulu emhlabeni wonke, uMalik Yoba, izohlomisa ngolwazi ozakwabo bakuleli kwiJoburg Film Festival eseSandton Convention Centre, eGoli ngoLwesithathu.
UMalik (56), wazakhela kakhulu udumo ngokulingisa indawo yomseshi, uJC Williams weNYPD kwiNew York Undercover nekaGavin kwiWhy Did I Get Married.
Ngaphandle kwalamafilimu, uMalik usenguqolothakamango kulo mkhakha wokulingisa ngenxa yokuthi udlale izindawo eziqavile emafilimini nasemidlalweni eminingi yethelevishini.
Umqondisi weJoburg Film Festival, uTim Mangwedi, uthe bajabule kakhulu ngokuhanjelwa kwalo mkhosi wamafilimu yinkakha enjengoMalik.
"Ikhono lakhe elingangatshazwa nokuzibophezela kwakhe emsebenzini wakhe wokulingisa kumphendule intandokazi emkhakheni wezokungcebeleka emhlabeni wonke futhi sizibona sihloniphekile ngokuba naye kwifestiveli yanamuhla."
Uthe ngaphandle kukaMalik, lo mkhosi wamafilimu uzobuye uhanjelwe nanguphrojusa futhi ongumqondisi wamafilimu osezakhele igama emazweni ngamazwe, uMelanie Nicole Clark.
"Sengijahe kabi ukuthola ulwazi olunzulu kuye ezinhlelweni zalo mkhosi," kuphetha uTim.Uthe izifundo zikaMalik zizofukula ngolwazi abadidiyeli bamafilimu abasacathula kodwa abanogqozi nofuqufuqu kulo mkhakha.
Eqhuba uTim uthe ngamava nolwazi aluthole kule minyaka eyibambile insimbi ishisa kulo munxa, kuzokhanyiseleka ozakwabo abebesadukuza ebumnyameni.
Esephetha uTim uthe abantu abazothola ingqayizivele yethuba lokuthekela ulwazi kuMalik yilabo abazobe bethenge amabheji efestiveli.
Ukuthamela lo mbuthano wamaciko asembonini yamafilimu kudingeka uthenge ithikithi elisukela kuR250 kuya kuR1000.
Ngemininingwane egcwele kungangenwa ku- www.joburgfilmfestival.co.za.