EMINYAKENI edlule abanye bebazi ukuthi uma ufuna ukubona izinhlelo ezihamba phambili futhi ezidlisayo kumele ukhokhe kakhudlwana kwiDStv, ukuze ube nesiteshi iM-Net.
IM-Net (101) beyaziwa ngezinhlelo ezintsha zakuleli nebezithathelwe phesheya kwezilwandle.
Bekuthatha eside isikhathi ukuthi ukwazi ukuzibona njengoba ubuphela nonyaka uma sezikhonjisiwe kwiM-Net ukuthi zidlulele eziteshini ezikhokha kancane njengoVuzu, Mzansi Magic nezinye.
Ukutabalasa ngasemalini kweMultichoice kwenze lesi siteshi sathwala kanzima.
Silahlekelwe izikhulu eziningi ebezenza umsebenzi oncomekayo wokulanda izinhlelo zaphesheya kwezilwandle zize kuleli.
Akugcinanga lapho ngoba kume nse ukuqoshwa kwezinhlelo nemidlalo yakuleli njengoba manje uma ungavula iM-Net kukhonjiswa izinhlelo, amafilimu nemidlalo kwasemazweni aphesheya kuphela.
Kodwa inkampani yokuqopha iPrimedia ezinze eKapa, ikhiphe abaningi eGibhithe njengoba ekuqaleni kwayo ukuqopha izinhlelo ivele yavula iminyango ngohlelo oluthakaselwe yiningi iThe Masked Singer.
Okwenze uhlelo olufana nalolu olungakaze lubonwe kuleli lwathakaselwa ukuthi lukhonjiswe kwiSABC.
Kuthe kusabhekwe lokho manje bakhombisa uhlelo obelwenza kahle ngababukeli, kwiM-Net iThe Masterchef South Africa.
Ngenyanga ezayo kulindeleke ukuthi le nkampani yethule uhlelo olusha oluthi The Traitors neDancing with the Stars.
IPrimedia ezinye zezinhlelo ezikhiqizayo ezenza kahle ezikhonjiswa kwiSABC kukhona kuzona iDeal or no Deal neWheels of Fortune.
Akekho ongaboni ukuthi iPrimedia ifike kwezwakala futhi iM-Net isale imbuleke izinqa njengoba kunzima ukubuyisa uhlelo olulodwa kuzona zonke ebizenza nebezithandwa.
Kumanje abalandeli bohlelo oluhamba phambili emhlabeni iSurvivor, abazi nokuthi kumele balindele ini njengoba sekuphele iminyaka emibili lungakhonjiswa.
Ngeke ngiqambe amanga, ngeke ngimangale uma ngingezwa kuthiwa iPrimedia isithathe isinqumo sokuthi iqhubeke nalo.
Inkampani iMultichoice, ayizame okusemandleni ukuthi ibuyise isithunzi seM-Net.
Abazame ukufaka imali kulesi siteshi ukuze siphinde sibuyelwe isithunzi sakudala.