OWAYENGUMSAKAZI woKhozi FM, uLinda “Mr Magic” Sibiya uswele amaphiko yinjabulo emva kokuthi abafundi abebengaphansi kwesikhungo sakhe iMagic Broadcasting Academy (MBA) bephumelele bonke njengoba bebethweswa iziqu.
Uthe bonke abafundi abangu-50 abathweswe iziqu bangabokuqala ukuqeqeshwa ngaphansi kwesikhungo sakhe. Bebeqeqeshwa ngaphansi kweMfolozi TVET College.
Uveze ukuthi abanye babo sebethole nemisebenzi njengoba kukhona asebeqashwe eziteshini zomphakathi okuyiDYR, Imvula FM neNorth Coast Radio.
“Ukuphumelela kwabo kungigqugquzele kakhulu. Yingakho ngizovula amanye amagatsha ezindaweni ezahlukene. Kumagatsha amasha kukhona elizoba seMgungundlovu, eThekwini, Port Shepstone, East London naseNelspruit.
“Ngiphinde ngibonge noMnyango wezobuCiko kuZwelonke osixhasile ngezitudiyo zokuqeqesha abafundi eThekwini naseMpangeni. Izifundo esibenzisa zona abafundi bethu zibhalisiwe ngokusemthethweni zikuNQF Level 5. Siphinde sisebenzisane neMICT Seta," kusho uMr Magic.
Uthe indlela abaqeqeshwa ngayo abafundi basesikhungweni sakhe, ibavumela ukuthi bangaziqalela namabhizinisi abo ngaphandle kokubheka ukuqashwa. Baqeqeshwa unyaka owodwa bese bethola iNational Certificate kwiRadio Production.