USUZOJATSHULELWA nguwonke wonke oneDStv umdlalo, iThe Wife, njengoba kusuka ngoDisemba 19 isizini yokuqala neyesibili yalo mdlalo oqale ukubonakala kwiShowmax, uzobonakala esiteshini uMzansi Wethu (193).
Uzokhonjiswa ngo-9.30 ebusuku. UShirley Adonisi, ongumqondisi wezinhlelo zakuleli kwaM-Net, uthe bathathe isinqumo sokuletha lo mdlalo kulesi siteshi ukuqhubekabajabulise ababukeli baso.
“Sisanda kuletha lo mdlalo kuMzansi Magic ngoSepthemba, usuka kwiShowmax. Ukuwuletha la usuya khona manje kungenxa yokuthi sifuna ukuqhuba isasasa ngawo njengoba kubonakala ukuthi uyathandwa futhi kuhlala kukhulunywa ngawo. Asifuni ukushiya muntu ngaphandle ongumndeni wethu ngalesi sikhathi samaholidi nesokuphana,” kusho uShirley.
Uthe injabulo yabo ifana nse neyabantu abazobe beqala ukubona lo mdlalo nabathemba ukuthi bazojabulela nabalingisi bawo. Uthe okunye okuthokozisayo ngalo mdlalo ukuthi usuphule amarekhodi ahlukene, ikakhulukazi isizini yokuqalaneyesibili.
Uveze ukuthi abaqalayo ukubona lo mdlalo bazojabulela ukubethulela abalingisi okukhona kubo uMbalenhle Mavimbela, Bonko Khoza, Zikhona Sodlaka, Abdul Khoza, Mondli Makhoba, Kwenzo Ngcobo, Kay Sibiya, Sipho Ndlovu, Siyabonga Shibe, Linda Majola noThuli Phongolo.
Khonamanjalo, kuphelile ngendawo kaMandisa (Zikhona Sodlaka) ngesizini yesithathu yomdlalo okumanje ikhonjiswa kwiShowmax.
Abalingisi bomdlalo bamfisele okuhle kodwa uZikhona, bamncoma ngokwenza umsebenzi oncomekayo endaweni abeyidlala.